TIRANE-Në kundërpërgjigje për akuzat e PS-së sipas të cilës Basha nuk ka mbajtur premtimet si kryebashkiak, Partia Demokratike shprehet se ai i ka dhënë vizionin e një qyteti modern Tiranës. “Sot nuk ka qytetar të Tiranës apo shqiptar që nuk e di se Lulzim Basha i ka dhënë Tiranës vizionin e një qyteti modern dhe europian me Bulevard të ri, terminal multimodal, transport modern pasagjerësh me tram, 200 projekte të realizuara në infrastrukturë, kopshte, shkolla e çerdhe, 25 mijë vende të reja pune, etj.”- u shpreh Reila Bozdo.
Më tej ajo theksoi se Edi Rama si kryebashkiak betonizoi Tiranën, si kryeministër është përgjegjës për papunësinë, varfërinë, mjerimin, pasigurinë dhe eksodin. Por përgjigjen më të mirë do ta japin qytetarët më 21 Qershor.
“Qytetarët shqiptarë pyesin sot ku është Edi Rama? Pse nuk ballafaqohet me popullin e tij? Pse fshihet pas papagajve të tij? Pse fshihet nëpër salla të errëta ku prezanton kandidatët larg syve të qytetarëve? Revolta popullore e ka futur sot në depression Edi Ramën por është e sigurt se me ndëshkimin që do marrë me 21 Qershor, nuk do të ketë doktor që ta marrë në dorë.”- përfundoi Bozdo.
(a.n/BalkanWeb)
