Anëtari i Kryesisë së PD, Grigels Muçollari denoncoi një tjetër skandal, sipas tij, që lidhet me betonizimin e kryeqytetit.

Përmes një deklarate për mediat nga selia blu, Muçollari tha se Qeveria do të japë stadiumin ‘Selman Stermasi’ tek miku i kryeministrit për ta kthyer në një mal betoni.

Duke zbuluar detajet e projektit, anëtari i Kryesisë së PD bëri të ditur se hapësirat anësore të stadiumit do të kthehen në ndërtesa shumëkatëshe.

“Me 120 mijë metra katrorë në dispozicion, është e sigurtë qē aty ku ishte stadiumi emblematik i qytetit, do të lindë një mal betoni, ku përfituesi, mik i Ramës do të ketë shansin të behet pronar i dhjetëra mijë metrave me çmimin më të lartë nē Tiranë”, tha Muçollari.

Deklarata e plotë

Do të donim që ditën e fundit të vitit të kishim vetëm urime për vitin e ardhshëm por fatkeqësisht jemi këtu për të denoncuar një akt në dëm të qytetarëve të Tiranës.

Edi Rama nuk humb kohë kur është fjala për të ndarë me miqtë e tij pronat më të çmuara të Shqipërisë, siç është stadiumi Selman Stermasi dhe asetet e tij, në zemër të Tiranës.

Ashtu siç kemi paralajmëruar, projekti për gjasme rijetëzimin e pronave shtetërore, nuk është tjetër vetëm një maskim për projektin klientelist të kullave qindra milionë euroshe, ku publiku, qytetarët, që janë pronarët e vërtetë, nuk përfitojnë asgjë.

Përkundrazi, teksa Rama me miqtë e tij shtojnë pasuritë, për banorët e Tiranës shtohet betoni, rriten çmimet dhe shtrëngohet dhe më shumë jetesa, ngushtohen edhe ato pak hapësira rekreative që kanë ngelur.

Korporata e Investimeve ka shpallur konkursin pak ditë më parë ku fton firmat për të paraqitur idetë për kullat tek ish-stadiumi Dinamo.

Njoftimi lë të kuptohet që projekti do të ketë parasysh zhvillim financiar e interesa ekonomike dhe pak flitet për sportin e futbollin

Me 120 mijë metra katrorë në dispozicion, është e sigurtë qē aty ku ishte stadiumi emblematik i qytetit, do të lindë një mal betoni, ku përfituesi, mik i Ramës do të ketë shansin të behet pronar i dhjetëra mijë metrave me çmimin më të lartë nē Tiranë.

Hapësirat pranë stadiumit, në vend që të ishin fusha që u krijojnë mundësinë të rinjve të merren me sport, apo kënde çlodhëse për fëmijët e të moshuarit, do të shndërrohen në godina betoni.

Nga mënyra si është hartuar procedura, nga kriteret e shpallura, duket qartë se e gjitha është një pajë për klientin, fitues i paracaktuar.

I paracaktuar në paradhomat e Kryeministrit.

Në fund të mandatit, asgjë nuk ka ndryshuar tek Edi Rama.

Ai e konsideron Tiranën dhe Shqipërinë si pronën e tij, të cilën e ndan sipas interesave.

Shfaqjet me juri e me skena, e me ekrane, janë thjesht mbulim i babëzisë për pasurim.

Qytetarêt e Tiranës dhe të gjithë Shqipërisë nuk mund ta lejojnë më Edi Ramën të sillet si pronar i pasurive dhe jetës se tyre, kështu qe urimi im sot për ju është: le të jetë ky viti ku në shqiptarët e ndalim njëherë e mirë këtë sundues abuziv me taksat dhe pronat publike.

(BalkanWeb)