Partia Demokratike ka nisur mobilizimin e elektoratit në Mirditë me konstituimin e shtabit elektoral dhe prezantimin e kandidatit të saj, Aleksandër Lala. Deputeti i PD, Agron Gjekmarkaj, e cilësoi këtë një hap vendimtar për fitoren e opozitës në zgjedhjet e 11 majit, duke e quajtur Mirditën një bastion të vlerave historike dhe të ndryshimit.

“Kandidati ynë, Aleksandër Lala, është një intelektual dhe politikan i njohur në trevë. Ai do të përfaqësojë me dinjitet Listën e Koalicionit të Shqipërisë Madhështore, duke maksimalizuar votën dhe besimin tek një e ardhme më e mirë,” deklaroi Gjekmarkaj.

Në fjalën e tij, deputeti demokrat u shpreh se PD është e vendosur për të sjellë një rezultat fitues në Mirditë dhe në të gjithë vendin, duke e konsideruar qeverinë aktuale përgjegjëse për varfërimin dhe keqqeverisjen.

“Qeveria në ikje i ka bërë dëm të madh Mirditës, Lezhës, Kurbinit dhe gjithë Shqipërisë. Më 11 maj, shqiptarët do të votojnë për ndryshimin, kundër korrupsionit dhe skandaleve që kanë pllakosur vendin,” shtoi ai.