TIRANE – Partia Demokratike akuzon kryeministrin Rama se po shemb pasuritë e qytetarëve në Pogradec, për t’i hapur rrugën ndërtimit të fshatit turistik të deputetit dhe kryetarit të PS-së së Pogradecit. Deputeti Gjergji Papa denoncoi atë që e cilësoi si skemë korruptive dhe klienteliste me pronat e Hudenishtit.

“Shembja e pasurisë së 53 familjeve në Hudenisht, në kundërshtim me ligjin, pa procedurë, në shkelje të të drejtës themelore të pronës, bëhet për arsye klienteliste e korruptive të Edi Ramës. Shtëpitë, hotelet, dhe pasuritë e qytetarëve, po prishen për t’i hapur rrugë investimit, fshatit turistik të kryetarit të Partisë Socialiste për Pogradecin dhe deputetit të Edi Ramës, Ilir Xhakolli.”- deklaroi Papa.gjergji papa

“Kemi këtu vendimin për dhënien në përdorim të tokës që i jep të drejtën deputetit të Edi Ramës për të ndërtuar një ambient për aktivitet turistik me sipërfaqe 45 mijë metra katrorë. U prishet me dhunë prona e ligjshme qytetarëve, pa paraqitur asnjë shkresë zyrtare, për të pastruar terrenin për biznesin e qeveritarëve. Njeriu i Edi Ramës jo vetëm e do gjithë Hudenishtin për vete, por nuk do as konkurrencë. Ky rekord korruptiv, ku dëbohen qytetarët e vendit nga pronat e tyre të ligjshme, për të favorizuar biznesin e Kryeministrit dhe deputetit të tij, po ndodh sot ditën për diell në sytë e qytetarëve. Kjo është oligarkia në veprim, që merr përvetëson pasurinë publike, shkatërron pasurinë e qytetarëve, që nuk ndalet para asgjëje për interesat personale. Edi Rama refuzoi në mënyrë të përsëritur të dëgjonte zërin e banorëve të Hudenishtit, që kanë investuar mundin e djersën e jetës, refuzoi të dëgjonte padrejtësinë që po u bëhej”- tha Papa.

“Po ja ku del e vërteta. Nuk kemi të bëjmë thjesht me arrogancën e zakonshme, me armiqësinë që kryeministri tregon ndaj qytetarëve. Por kemi të bëjmë me biznesin e tij dhe të deputetit të tij. Ky korrupsion tronditës, nuk do të lejohet. Ne ftojmë qytetarët ta kundërshtojmë me çdo mjet. Partia Demokratike do të jetë në krah të tyre, dhe zotohet publikisht se do të mbrojë të drejtat e tyre deri në fund. E keqja do të ndalet. Askush nuk do të gëzojë frytet e zullumit më të pashembullt të Edi Ramës dhe klientelës së tij.”- deklaroi deputeti demokrat.
(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: