TIRANË – Partia Demokratike ka vendosur të zhvillojë protesta të përditshme ndaj kreut të Kuvendit, Ilir Metës, deri në dorëheqjen e tij. Vendimi u mor në Aktivin e saj, që u mblodh në orën 18:00 dhe doli dy orë më pas me planin e ri të luftës opozitare.

Do të jetë FRPD-ja që do të zhvillojë çdo ditë në Tiranë dhe në rrethe, protesta kundër kryeparlamentarit, ndërsa deputetët dhe drejtuesit e PD-së, të enjteve do të shkojnë para selisë së Kuvendit, në kohën kur do të nisin seancat parlamentare, për të kërkuar largimin e tij nga posti.

Kryetari i PD-së Lulzim Basha deklaroi se “Objektivi ynë politik është i qartë: Hetim gjithpërfshirës, i plotë dhe i pavarur, i besueshëm për qytetarët shqiptarët, që sot nuk kanë pikë besimi se e drejta do të dalë në shesh dhe po shohin se si Ilir Meta dhe Edi Rama përpiqen ta bëjnë qesharak hetimin duke sjellë humoristë në dyert e prokurorisë, që në fakt është presion i hapur ndaj hetimit, është t’i thuash prokurorisë “Mos heto”, është t’i thuash si para një jave, “mbylle sa më shpejt çështjen”.

Së dyti, forcimi i kapaciteteve hetuese të prokurorisë së shtetit, – theksoi ai,- janë shanset e vetme për zbardhjen e kësaj ngjarjeje. Nëse kërkojmë zbardhje përmes institucioneve dhe ligjit, i vetmi shans që kjo të ndodhë, është me Ilir Metën jo Kryetar Kuvendi.Ky është kushti ynë i parë. Kushti ynë i dytë është, seriozitet në procesin e dekriminalizimit, i cili nuk mund të jetë serioz kur numri dy i shtetit akuzohet për vrasjen e dy deputetëve, dhe vazhdon të ngrohë karrigen e numrit dy të shtetit; hetim që nuk mund të jetë serioz kur kryeministri dikton si kryeprokuror dhe si kryegjyqtar se si duhet të dalë përfundimi i hetimeve; hetim që s’mund të jetë serioz kur Ministri i Brendshëm është nën akuzë se ka bashkëpunuar me vrasësit e pretenduar për të fshehur provat,” – tha Basha.

Aktivi i PD-së, i përbërë nga Kryesia, deputetët, krerët e partisë në rrethe, vendosi që lufta opozitare të fokusohet në dekriminalizimin e Kuvendit dhe të politikës në tërësi, duke nisur nga largimi i Metës.

Ky aktiv u mblodh një ditë pas organizimit të protestës së PD-së dhe aleatëve të saj në sheshin “Skënderbej”, në të cilën u kërkua dorëheqja e Kryetarit të Kuvendit, Ilir Metës, pas akuzave publike të deputetit të mazhorancës Tom Doshi ndaj tij për vrasje të porositura.

DEKLARATA E PLOTE Z.BASHA

Z.Basha, përse u mblodh Aktivi i PD-së?

“Aktivi i zgjeruar i Partisë Demokratike është mbledhur sot pas protestës madhështore të ditës së djeshme për të analizuar situatën e rëndë në vend si rezultat i ngjitjes së krimit në kupolën e shtetit, i kapjes së pushtetit nga krimi, veshjes së krimit me pushtet dhe veshjes së pushtetit me krim, kjo si nëna e të gjitha të këqijave në vend. Kur numri dy i shtetit, Kryetari i Kuvendit, është nën akuzë se ka porositur vrasjen e dy deputetëve, kur kryeministri bën lolon, skenaron, regjizon, përpjekje për të trysnuar prokurorinë, për të fshehur të vërtetën, pasi është përpjekur për ta mbajtur të fshehtë për 6 muaj, kur ministri i brendshëm është bashkëfajtor në kuptimin penal të fjalës në fshehjen e krimit, sepse në vend të veprimeve ligjore është ulur në rezidenca qeveritare me kriminelë dhe vrasës siç pretendohet nga akuzuesit, për të mbyllur pazaret, këtu në këtë vend asgjë nuk është më normale. Askush nuk mund të presë siguri për veten e tij, për fëmijët e tij, apo të saj. Askush nuk mund të presë reforma, zhvillim, punësim dhe e kam fjalën jo për opozitarët por e kam fjalën për shumicën dërrmuese të shqiptarëve, edhe ata që 1 vit e gjysmë më përpara u besuan me vote, dhe që sot shohin se asnjë premtim nuk po mbahet dhe asnjë premtim nuk do të mbahet por jo vetëm kaq, vendi po ecën në drejtimin e gabuar. Po ecën në drejtimin e gabuar dhe shkaku kryesor është kriminalizimi i shtetit, kriminalizimi i qeverisjes, ngritja e krimit në sistem, kapja nga krimi e krerëve më të lartë të qeverisjes dyshes Rama-Meta.

Ndaj protestat do t’i bëni të përjavshme te Parlamenti?

Objektivi ynë politik është i qartë: një hetim gjithëprfshirës, i plotë dhe i pavarur, i besueshëm për qytetarët shqiptarët që sot nuk kanë pikë dyshimi se e drejta do të dalë në shesh dhe po e shohin se si Ilir Meta dhe Edi Rama përpiqen ta bëjnë qesharak hetimin duke sjellë humoristë në dyert e prokurorisë që në fakt është presion i hapur ndaj hetimit, është t’i thuash prokurorisë mos heto, është ti thuash prokurorisë siç i thanë para një jave mbylle sa më shpejt çështjen. Së dyti, forcimi i kapaciteteve hetuese të prokurorisë së shtetit, janë shanset e vetme për zbardhjen e kësaj ngjarjeje. Nëse kërkojmë zbardhje përmes institucioneve dhe ligjit, i vetmi shans që kjo të ndodhë, është me Ilir Metën, jo Kryetar Kuvendi dhe me një prokurori që të lejohet të funksionojë dhe të punojë sipas ligjit. Ky është kushti ynë i parë. Kushti ynë i dytë është, seriozitet në procesin e dekriminalizimit, i cili nuk mund të jetë serioz kur numri dy i shtetit akuzohet për vrasjen e dy deputetëve, dhe vazhdon të ngrohë karrigen e numrit dy të shtetit, i cili nuk mund të jetë serioz kur kryeministri dikton si kryeprokuror dhe si kryegjyqtar se si duhet të dalë përfundimi i hetimeve, hetim, i cili nuk mund të jetë serioz kur Ministri i Brendshëm është nën akuzë se ka bashkëpunuar me vrasësit e pretenduar për të fshehur provat, ndaj duke identifikuar si problemin më të madh, si sfidën më të madhe që vendi ka, duke u thënë shqiptarëve që Shqipëria nuk ka të ardhme pa trajtuar problemin e kriminalizimit të shtetit, duke ndarë me shqiptarët shqetësimin se është kriminalizimi i shtetit burimi i të gjitha të këqijave, ne kemi vendosur një strategji protestash të vazhdueshme deri në plotësimin e kërkesave tona.

Si do të organizohen protestat?

Do të keni informacion të plotë për organizimin e protestave nga komiteti që është ngarkuar për organizimin e protestave.

Zoti Basha, ju në deklaratën e sotme në drekë u shprehët se nuk mund të pritet dita e votimit për të larguar një mazhorancë të tillë. Çfarë kishit ndërmend me këtë, po bëheni gati për një skenar zgjedhjesh të parakohshme?

Asgjë nuk përjashtohet. Ne kërkojmë një rrugëdalje. Shqiptarët kërkojnë një rrugëdalje nga kjo situatë. A mund të ecet më kështu? A mund të pretendohet të ecet më kështu përpara? A mund të pretendohet se të zezat që po ndodhin nuk ndodhin? A mund të pretendohet se kemi siguri për shqiptarët, për fëmijët e tyre kur numri i shpërthimeve me eksploziv dyfishohet, kur policët dhe forcat speciale janë krah më krah me krimin dhe jo ballë për ballë me krimin, kur ministrat drekojnë dhe darkojnë me krimin, kur kryeministri fsheh për 6 muaj krimin, kur Kryetari i Kuvendit është nën akuzë për porositjen e vrasjes së dy deputetëve? A mund të pretendojmë se jemi në një situatë normale, kurrsesi. Ne kemi ofruar rrugët e zgjidhjes. Dhe rrugët e zgjidhjes institucionale kalojnë në mënyrë të domosdoshme përmes dorëheqjes së ilir Metës si kreu i kuvendit të shqipërisë. Për ne, Ilir Meta nuk është dhe nuk do të jetë Kreu i Kuvendit të Shqipërisë. Ndaj dhe ne i bëjmë thirrje shqiptarëve të bashkohemi siç u bashkuam dje, në një sezon protestash mbarëpopullore në Tiranë dhe anë e mbanë Shqipërisë, për t’i thënë ndal kësaj mënxyre, ndal krimit në qeverisje, ndal varfërisë, papunësisë, pasigurisë, tritolit, terrorit, dhunës që kanë një burim dhe një nyje Gordiane. Nyjen e krimit të lidhur me pushtetin, të pushtetit të lidhur me krimin, kjo nyje Gordiane do këputet me çdo çmim. Partia Dmeokratike e konsideron këtë një mision fondamental në ekzistencën e saj, kjo nuk është një llogari politike, asgjë nuk është më si më parë, asgjë nuk mund të jetë më si më parë, pa mundur dhe pa fituar, pa triumfuar mbi krimin. Asgjë nuk mund të jetë si më parë pa triumfuar mbi krimin. Ndaj jam i bindur që ashtu siç iu përgjigjen thirrjes tonë në protestën madhështore të ditës së djeshme, shqiptarët do ta mbështesin thirrjen që u drejtoj sot në emër të Partisë Demokratike për t’u ngritur në protesta të pandalshme deri në triumfin e të drejtës, të vërtetës, të ligjit mbi krimin.

(ar.sh/BalkanWeb)