Në një operacion të zhvilluar nga SPAK, janë zbuluar prova të një laboratori të avancuar të kokainës në fshatin Qerekë, pranë Rinasit dhe Portit të Durrësit. Ky aksion ka çuar në arrestimin e tre shtetasve të huaj dhe ka zbuluar një skemë të sofistikuar të trafikimit të drogës, ku përdoren lëkura lope të regjura si maskim për transportin e kokainës.
Gazetarja Klodiana Lala, e ftuar në emisionin “Open” në News24, ka dhënë detaje mbi hetimet që çuan në zbardhjen e kësaj ngjarje. Sipas saj, grupi kriminal ka përdorur një kompani të themeluar në vitin 2020, e cila pretendonte se merrej me importimin e lëkurëve të kafshëve, por në të vërtetë kishte një qëllim të fshehtë, transportimin e drogës.
Lëkura e regjur e lopëve, e importuar nga Republika Domenikane dhe e mbërritur në Shqipëri përmes Portit të Durrësit, ishte përdorur si një kamuflazh për kokainën.
Hetimet intensive të SPAK-ut, përfshirë përgjimet dhe blerjet e simuluara, zbuluan se në ngarkesat e lëkurëve të lopëve kishte kokainë të fshehur. Pas konfirmimit të këtij fakti, autoritetet arrestuan dy shtetas venezuelianë dhe një kolumbian, të cilët dyshohet se kishin rolin e kimistëve dhe ishin përgjegjës për përgatitjen dhe ndarjen e kokainës nga lëkura.
Njëri prej tyre, një shtetas venezuelian, u arrestua në Aeroportin e Rinasit, teksa po përpiqej të largohej nga Shqipëria. Një tjetër, gjithashtu nga Venezuela, u kap në një banesë luksoze në Kodra e Diellit, ndërsa kolumbiani u ndalua në një restorant në Vishnje, gjatë një darke.
SPAK ka deklaruar se është konfiskuar një sasi prej 6 kilogram kokainë nga ky operacion, ndërsa grupi kriminal është vënë nën hetim për trafikun e drogës dhe përfshirjen në aktivitete kriminale ndërkombëtare. Sipas hetuesve, zona e Qerekës, e cila është afër aeroportit ndërkombëtar dhe portit të Durrësit, ka pasur një rëndësi strategjike për trafikimin e drogës, por ka sfida për monitorimin e saj për shkak të fluturimeve ajrore që zhvillohen në atë hapësirë.
Ky operacion është një tjetër goditje ndaj grupeve kriminale që operojnë në Shqipëri dhe tregon angazhimin e SPAK për të luftuar trafikun e drogës dhe pastrimin e parave, duke përdorur metoda të avancuara të hetimit dhe bashkëpunim ndërkombëtar.
(BalkanWeb)
