Ajo që ndodhi në orët e para të mëngjesit të sotëm në komisionin hetimor të “Sterilizimit” me “përplasjen” mes ish-ministrit Ilir Beqaj dhe deputetes Ina Zhupa, ka shkaktuar tensione që në nisje të seancës së sotme plenare.
Flamur Noka u shpreh se Kreu i Gardës duhet të mbajë përgjegjësi pasi e ka lënë pa gardistë komisionin, duke mundësuar kështu hyrjen e Beqajt në sallën ku po mbahej mbledhja.
“Duhet të mbajë përgjegjësi që mbrëmë e ka lënë komisionin pa gardistë në sallën ku zhvillohej komisioni. Beqaj guxonte të intimidonte deputetët.
Kryetari i Komisionit është ai që urdhëron Gardën ta lejojë të hyjë apo jo”, tha ai.
Ndërkohë, kreu i grupit parlamentar të PD, Gazment Bardhi u shpreh se kryetarja e Kuvendit Elisa Spiropali duhet të jetë e shqetësuar në lidhje me faktin që një nga deputetët e PD është kërcënuar gjatë punës në Kuvend, jo të shqetësohet në lidhje me etikën e komunikimit të deputetëve në seancë.
Në lidhje me mbylljen e komisionit, Bardhi u shpreh se nuk ka përfunduar planin e punës, dhe ndërprerja e tij duke mos shtyrë afatet, nënkupton mohimin e të drejtës së opozitës për të hetuar.
Pjesë nga diskutimi:
Noka: Dje një hajdut dy metra i gjatë, i burgosur politik. E para shkelje e rregullores pa papasur deputetët. Seanca parlamentare çelet kur janë deputetët në sallë, ju e keni hapur pa pasur deputetët.
Nuk mund të fillojë seanca pa korum. E dyta, dje një akt i turpshëm i inkurajuar nga dhuna që ju ushtroni ndaj opozitës, i inkurajuar nga dhuna e policisë ndaj opozitës, në kundërshtim me ligjin që hyn në sallën e parlamentit, i inkurajuar nga dhuna që ju i jepni urdhër gardës të ushtrojë ndaj opozitës, i inkurajuar nga dhuna verbale që kryeministri i këtij vendi ushtron nga mëngjesi në darkë kundër opozitës, një hajdut dy metër i gjatë, i burgosur për vjedhje, guxon që të sulmojë, agresojë kuvendin e Shqipërisë, deputetët e komisionit hetimor të shëndetësisë.
Komandanti i Gardës duhet të mbajë përgjegjësi para ligjit, që mbrëmë e ka lënë komisionin hetimor të shëndetësisë, pa gardistë, pa asnjë punonjës garde në sallën ku zhvillohej komisioni dhe Ilir Beqaj, hajduti dy metra së bashku me avokatin e tij, guxonin të intimidonin deputetët.
Në bazë të rregullores për Komisionet Hetimore apo dhe komisionet parlamentare, kryetari i Komisionit urdhëron gardën të hyjë apo të dalë, sikundër dhe ju keni urdhëruar në shkelje të ligjit, gardën, ashtu urdhëron dhe kryetarja. Frika nga hetimi, ajo që ishte mbrëmë, thelbi është se ajo tregon fytyrën e hajdutërisë.
Bardhi: E para zonja Spiropali kur kolegu Noka po i drejtohej hajdutit 2 metrosh po i referohej Beqajt, nuk e di pse ju shkoi mendja tek kryeministri
Spiropali: Kjo foltore nuk mund të përdoret për të fyer askënd. Mos ta përdorim si armë atë mikrofon.
Nuk ka rëndësi a është kryeministër, i burgosur apo i paraburgosur.
Bardhi: Nuk keni asnjë të drejtë të më ndërhyni. Nuk e kuptova pse ju shkon mendja te Rama. Meqë kujdesesh për etikën, duhet të shqetësohesh që një i paraburgosur që ruhet sipas ligjit të posaçëm, dje lëvizte i lirë në ambientet e Kuvendit madje guxonte të futej në sallën e mbledhjes së komisionit dhe guxonte i pashqetësuar as nga Garda e as policia e burgjeve, për të ruajtur integritetin fizik të deputetëve, të kërcënonte deputetët.
Ju duhet të ishit shqetësuar për këtë jo për etikën tonë të komunikimit për një person që është kapur dy herë duke vjedhur.
Dje në Konferencën e Kryetarëve keni vendosur mos shtyrjen e afateve të komisionit, sipas ligjit të përfundosh pa mbyllur planin e hetimit është t’i mohosh opozitës të drejtën e hetimit.
Spiropali: Kërkesa për shtyrjen i është paraqitur dje Konferencës së Kryetarëve. Ndihem në faj që e kam çuar atë kërkesë edhe pse nuk kishte një vendim të ndërmjetëm. Nuk jap dot një koment në lidhje me ngjarjen pasi do të shihen kamerat dhe të gjitha rrethanat.
Bardhi: Nuk ka asnjë rregull në ligj që kërkohet vendim i ndërmjetëm nga komisioni për shtyrjen e afatit.
