Ministrja e Arsimit dhe Sportit, Ogerta Manastirliu, tregoi detaje sa i takon organizimit në Shqipëri të “Giro d’Italia Grande Partenza”, turit çiklistik që do të mbahet majin e ardhshëm për herë të parë në vendin tonë.
Gjatë fjalës së saj ministrja tha se ngjatja sportive me biçikleta do të realizohet në tre bashki, në Tiranë, Durrës e Vlorë.
Manastirliu shtoi se ky event i madh sportiv do të realizohet në bashkëpunim të ngushtë me të gjitha strukturat e vendit tonë, ndërsa theksoi se është një mundësi e shkëlqyer për Shqipërinë, turizmin dhe për promovimin e sportit të çiklizmit te të rinjtë.
“Ditë e veçantë ku tashmë është bërë e ditur se nisja e madhe do të realizohet në Shqipëri në muajin maj 2025. Shqipëria vendoset për herë të parë në hartën ndërkombëtare të aktiviteteve të Giro d’Italias nëpër botë, pas Francës, pas Belgjikës, pas Hungarisë dhe Izraelit. Shumë të kënaqur që do të mirëpresim nisjen e madhe të “Giro d’Italia” në Shqipëri. Aktivitet që do realizohet në bashkëpunim të ngushtë me të gjitha strukturat tona. Tre turet e nisjes së madhe do realizohen në tre bashki, në Tiranë, Durrës dhe Vlorë. Kjo është mundësi e shkëlqyer për Shqipërinë, pikë e fortë për sa i përket turizmit, mundësi e artë për promovimin e sportit dhe çiklizmit te të rinjtë”, tha ajo.
(BalkanWeb)
