Dy grupe kriminale dolën nga hetimet e Prokurorisë Publike të Breshias për një rrjet të madh të trafikut të drogës që çoi në arrestimin e 45 personave, mes tyre 3 shqiptarë, dhe regjistrimin e 87 të tjerëve në regjistrin e të dyshuarve.

Në përgjithësi, u hetua trafikimi i rreth 2 mijë kilogramë kokainë, 1,500 kilogramë hashash dhe 700 kilogramë marijuanë. Grupi i parë kriminal, i cili vepronte veçanërisht në provincën e Breshias, dyshohet se importonte drogë direkt nga vendet prodhuese, konkretisht kokainë nga Kolumbia, falë ndërmjetësimit të një gruaje që besohej se ishte e lidhur me individë nga “klani i Gjirit”. Dhe hashashi nga Maroku, që përbënte grupin e dytë kriminal, kalonte tranzit nëpër Spanjë.

Në listën e gjatë të të arrestuarve në grupin e parë ishte edhe Shkëlzen Guzina (datëlindja 1990) dhe Gjon Prela (1985). Në grupin e dytë mes atyre që përfunduan në pranga ishte edhe Skerdi Bocoi (datëlindja 1976).

(BalkanWeb)