Ministri ukrainas i Mbrojtjes, Rustem Umerov deklaroi  se në bazën ajrore Ramstein në Gjermani, ka filluar takimi i Grupit të Kontaktit për Mbrojtjen e Ukrainës.

Ministri Umerov në deklaratën me shkrim nga llogaria e tij e medias sociale tha se në kuadër të takimit është takuar me Sekretarin e Mbrojtjes të SHBA-së, Lloyd Austin dhe se ka diskutuar për çështjet e bashkëpunimit mes dy vendeve.

“Në takim do të diskutohet ‘harta udhërrëfyese’ që do të përbëjë bazën për t’i ofruar Ukrainës mbështetje dhe ndihmë për mbrojtjen ajrore, artileri, automjete të blinduara, mjete ajrore pa pilot, forcat ajrore, sigurinë detare dhe zona të tjera të rëndësishme të paktën deri në vitin 2027”, tha Umerov i cili shtoi se dokumenti në fjalë do të miratohet sot nga liderët e koalicionit.

Sekretari i Mbrojtjes i SHBA, Lloyd Austin, do të udhëtojë  gjithashtu nga Uashingtoni në bazën ajrore Ramstein.

Në këtë takim historik, Austin do të angazhohet me ministra të Mbrojtjes dhe zyrtarë të lartë ushtarakë nga e gjithë bota për të diskutuar nevojat e menjëhershme të betejës së Ukrainës, kërkesat afatgjata të mbrojtjes dhe koordinimin e rëndësishëm që po kryhet përmes koalicioneve të aftësive.

Ekziston një grup udhëheqës i koalicionit brenda UDCG-së më të gjerë që përfshin tetë koalicione aftësish, secila duke u fokusuar në aftësitë specifike ushtarake për Ukrainën dhe të udhëhequr nga të paktën dy vende anëtare të NATO-s.

Balkan Web