Populli Maori i Zelandës së Re ka një mbretëreshë të re.
Nga Wai Hono i te po Paki, vajza më e vogël e mbretit të ndjerë Tuheitia Pootatau Te Wherowhero VII (27 vjeç) do të jetë mbretëresha e dytë Maori në lëvizjen e dinastisë së tetë Kiingitanga të Zelandës së Re, dhe u ngjit në fron në një ceremoni ku morën pjesë mijëra njerëz.
Nga Wai Hono i te po Paki u zgjodh pavarësisht se ishte vajza më e vogël e mbretit të ndjerë, e treta e lindur dhe që kishte dy vëllezër meshkuj më të mëdhenj. Zgjedhja e saj erdhi në mëngjesin e fundit të tangihanga (funeralit) gjashtë-ditore të babait të saj.
Në Perëndim, populli Maori është bërë i famshëm falë hakës, kërcimit tradicional të luftës që luhet para çdo ndeshje të All Black, ekipit të regbis të Zelandës së Re, por edhe të kombeve të tjera të Oqeanit si Tonga. Por Maori janë një popullsi indigjene që kanë luftuar për të ruajtur traditat e tyre që nga ardhja e kolonëve të parë.
Për këtë qëllim Kiingitanga u themelua në 1858 si një forcë për t’i rezistuar kolonizimit dhe për të kërkuar ruajtjen e kulturës dhe tokës Maori. Kiingitanga nuk ka mandat ligjor dhe megjithëse roli i monarkut është kryesisht ceremonial, ai konsiderohet gjithashtu udhëheqësi suprem i disa fiseve.
Siç raporton The Guardian, Nga Wai Hono i te po Paki, u zgjodh për fronin, i cili nuk është automatikisht i trashëguar, nga këshilli i Kiingitanga, një grup prej 12 pleqsh nga fise të ndryshme. Ajo u kurorëzua me ceremoninë e ngritjes së Te Whakawahinga, një ceremoni që daton tetë breza. “Ne ndjekim tikanga-n e paraardhësve tanë që krijuan Kiingitanga për të bashkuar dhe ngritur popullin tonë dhe kemi zgjedhur Nga Wai Hono i te po si monarken tonë të re”, tha presidenti i Tekau-Maa-Rua, Che Wilson. Mbretëresha u vajos me vajra të shenjtë dhe u bekua me Biblën e përdorur për të kurorëzuar mbretin e parë Maori në 1858.
Nga Wai Hono i te po Paki ka një diplomë master në studimet kulturore Maori nga Universiteti i Waikato-s. Gruaja ka qenë e afërt me të atin në shumë evente të viteve të fundit dhe tashmë është e njohur dhe e dashur për njerëzit.
Annette Sykes, avokate për Te Tiriti o Waitangi, një traktat i vitit 1840 i nënshkruar nga Perandoria Britanike dhe rreth dyzet krerët e fiseve Maori të Zelandës së Re, tha se mbretëresha e re përfaqëson të ardhmen që ajo gjithmonë ka aspiruar. “Ajo është një frymëzim, rivitalizimi dhe rimëkëmbja e gjuhës sonë ka qenë një rrugëtim 40-vjeçar për shumicën prej nesh dhe ajo është mishërimi i kësaj, është gjuha e saj e parë dhe e flet me lehtësi”, tha Sykes.
