Në prag të ditës së Pavarësisë së Kosovës, ish-kapiteni i Kombëtares Kuq e Zi, Lorik Cana dhe Elvis Naçi vizituan kompleksin memorial “Adem Jashari” në fshatin Prekaz të Kosovës. Kulla e familjes Jashari është dëshmi e gjallë e asaj që ndodhi më 5 mars 1998. Dita e zezë e 5 marsit do të ngelet gjithmonë në kujtesën e mbarë popullit të Kosovës.
Forcat serbe vranë 59 anëtarë të familjes Jashari. Atë ditë u bashkuan të gjithë për të luftuar, djem e vajza, burra, gra, pleq, fëmijë. Beteja e Jasharëve dhe qëndresa heroike e tyre zgjat tri ditë: më 5, 6 dhe 7 mars 1998. Pasi iu vra gruaja dhe disa fëmijë në ditën e parë e të dytë të betejës, data 7 mars 1998 do të shënonte rënien e Komandantit të UÇK-së Adem Jashari dhe familjes së tij.
Përqendrimi i vëmendjes së ushtrisë dhe milicisë serbe ndaj familjes Jashari nuk ishte i rastësishëm. Ata e dinin se brenda atyre kullave ishte bërthama e luftës ose mendja e saj. Me aktin e rënies së komandantit legjendar Adem Jasharit, familjes së tij dhe Jasharëve të tjerë, Kosova mundi frikën me çka i hapi shtigjet e lirisë dhe të ardhmërisë. Dhe jo rastësisht, në Prekaz, në Lagjen e Jasharëve është ngritur monumenti më i madh i luftës për liri, për pavarësi e demokraci. Ciceroni i këtij kompleksi në Prekaz i tregon Elvisit dhe Lorikut se për vite më radhë besohet se kanë ardhur dhe e kanë vizituar miliona qytetarë shqiptarë nga të gjitha trojet etnike dhe nga shumë shtete të botës.
Ciceroni rrëfen dhe detaje të tjera të dhimbshme për masakrën që ju bë familjes Jashari nga mbi 4000 forca serbe, që rrethuan banesën. 12 të vrarë ishin fëmijë.
Përveç shtëpive të shndërruara në muze, këtu gjenden edhe të gjitha varret e të rënëve në luftë të familjes Jashari. Elvis Naçi qëndron pranë varreve dhe lutet për shpirtrat e tyre.
Pranë varrit të tre martirëve Shaban, Hamëz dhe Adem Jashari qëndrojnë gjithmonë dy efektivë të Gardës, të cilët nderon Komandantin Legjendar dhe mbarë familjen Jashari.
Lorik Cana i thotë Elvisit se ky vend është kthyer në pelegrinazh për mbarë shqiptarinë.
“Ky vend të kthen me këmbë në tokë, të bën të reflektosh, mendon se çfarë mund të bësh për njerëzit e tu” shprehet Loriku.
“Shikojmë sot këtë familje që ka derdhur gjak për të mbrojtur vendin e tyre. Ne në kohe lufte nxjerrim trima, por jo larg prej këtu kemi një familje qe jetojnë në kushte të vështira, kemi shkuar natën i kemi vizituar muaj më parë, nuk kam fjale te ta përshkruaj” shprehet Elvisi.
(BalkanWeb)
