Presidentja e Komisionit Evropian Ursula von der Leyen ka bërë thirrje që luftimet në Gaza të ndalen menjëherë, pasi ajo shpreson të sigurojë edhe pesë vite të tjera si Presidente e Komisionit të BE-së.
“Dua të jem shumë e qartë: gjakderdhja në Gaza duhet të ndalet tani. Shumë fëmijë, gra dhe civilë kanë humbur jetën si rezultat i përgjigjes së Izraelit ndaj terrorit brutal të Hamasit,” tha von der Leyen në një fjalim para eurodeputetëve në Strasburg të enjten.
“Populli i Gazës nuk mund të durojë më. Njerëzimi nuk mund të durojë më”, theksoi ajo.
Lufta Izrael-Hamas filloi më 7 tetor, pasi ekstremistët e Hamasit hynë në Izrael në orët e hershme të mëngjesit, duke vrarë të paktën 1200 civilë dhe duke marrë mbi 240 pengje.
Gjatë nëntë muajve të fundit, më shumë se 38,600 palestinezë janë vrarë, kryesisht për shkak të bombardimeve izraelite në Gaza, sipas ministrisë së shëndetësisë të territorit. Autoritetet e Gazës nuk bëjnë dallime mes viktimave civile dhe atyre luftarake.
Si shefe e Komisionit, von der Leyen ishte akuzuar më parë për njëanshmëri pro-izraelite.
Në Strasburg, katër eurodeputetë irlandezë nga grupi liberal Renew Europe vendosën të shkojnë kundër linjës së tyre partiake këtë javë dhe të votojnë kundër rizgjedhjes së saj.
“Kam lexuar udhëzimet e saj politike. Kam dëgjuar kontributet e saj në takimet e grupit tonë. Por për fat të keq, nuk kam dëgjuar mjaftueshëm për të më bërë të mendoj se ka një ndryshim të politikës, veçanërisht për Gazën,” tha Barry Andrews nga Renew Europe..
Andrews ka marrë mijëra letra nga votuesit për këtë çështje, duke kërkuar një urdhër arresti për kryeministrin izraelit Benjamin Netanyahu. Megjithatë, BE-ja mbetet thellësisht e ndarë për konfliktin izraelito-palestinez.
