E tashmja, e shkuara dhe e ardhmha. Maurizio Sarri është prezantuar me ide të qarta në pankinën e Juventusit. Trajneri ka nisur zyrtarisht punën me kampionët italianë. Detyra e parë ishte t’i përgjigjej interesimit të madh të mediave. “Ky është kurorëzimi i një karriere të gjatë. Mendoj se i kam respektuar të gjithë dhe për këtë duhet të respektoja edhe karrierën time”, ishin fjalët e para të Sarrit gjatë prezantimit zyrtar si trajner i “Zonjës së Vjetër”.

Nuk mund të mungonin pyetjet për të shkuarën, që lidhen mbi të gjitha me Napolin, rivalin kryesor të Juventusit në vitet e fundit. “Jetova tre vite me idenë fikse për të mundur Juventusin. Dhashë 110% por nuk ia dola. Ishte një rivalitet sportive, por përfundoi. Profesionalizmi im më detyron të japë këtu maksimumin”, ka vijuar më tej Sarri.

Më pas, gjithçka u fokusua tek e ardhmja dhe misioni për të fituar Champions League. “Nëse rezultati kthehet në një detyrim, atëherë humbja është e sigurtë. Juventus ka detyrë që të niset si favorite në Champions, por në Europë ka 8 ose 9 skuadra që mund ta fitojë. Champions është një objektiv, një ëndërr që duhet ndjekur, pork a një koefiçent të frikshëm”, është shprehur trajneri i ri i Juventusit.
(balkanweb)