Çështja e pronave të minoritetit grek në Shqipëri është diskutuar në Bruksel. Eurodeputeti grek Kostas Chrysogonos kërkoi disa përgjigje, për atë që ai e cilëson si “shpronësimin e tokave të minoritarëve nga qeveria shqiptare”. Konkretisht, eurodeputeti grek referohet në “agresivitetin e qeverisë shqiptare me shpronësimin e një zone të gjerë të bregdetit Vlorë-Sarandë, ku përqindja më e madhe i përket minoritarëve grekë”.
Sipas eurodeputetit grek kjo është një shkelje e rëndë dhe kundërshtim me Konventën Evropiane për të Drejtat e Njeriut, dhe se po merren masat çështja të ndiqet nga drejtësia.
Përgjigje mori nga komisioneri për Zgjerim, Johannes Hahn i cili tha se: “Komisioni Evropian i jep rëndësi të madhe të drejtës së pronësisë dhe të sundimit të ligjit për të zgjidhur konfliktet pronësore në të gjithë Shqipërinë”.
“Në raportin e tij vjetor për Shqipërinë, të publikuar më 17 prill të 2018, Komisioni ka deklaruar se vendi nuk ka bërë ende progres në përmirësimin e kuadrit ligjor për regjistrimin, shpronësimin dhe kompensimin e pronave”, deklaroi Hahn.
“Komisioni është i vetëdijshëm për shqetësimet e shprehura nga minoriteti grek në Shqipëri mbi zbatimin e të drejtave të pronësisë dhe jemi duke monitoruar nga afër zhvillimet në këtë çështje. Gjithashtu, duke pasur parasysh kompleksitetin dhe rëndësinë e çështjes së të drejtave të pronësisë, Komisioni është duke ofruar ndihmë financiare dhe teknike në vend, për të adresuar mangësitë në këtë fushë”, theksoi më tej komisioneri Hahn.
Komisioni e konsideron tepër të rëndësishme mbrojtjen e të drejtave të minoriteteve dhe e ndjek çështjen me kujdes, duke i dhënë rëndësi të veçantë procesit në vijim.
