TIRANE

Në një kohë kur ditën e nesërme është paralajmëruar një protestë nga diaspora para Kryeministrisë, vjen një deklaratë nga kreu i grupit parlamentar të PS-së, Taulant Balla.


Ky i fundit në një prononcim për mediat tha se nëse do ishin ftuar në këtë protestë, PS do të merrte pjesë. Mes të tjerash ai tha se Shqipëria i ka një borxh të madh prej 28 vitesh diasporës, pasi kjo e fundit ka kontribuar në ekonomi.

“Nëse do ishim ftuar, edhe ne do ishim pjesë e protestës së diasporës. E dimë që Shqipëria i ka një borxh gjithë shqiptarëve që jetojnë në çdo cep të territorit dhe në këto vite janë kontributor i ekonomisë së vendit. Për PS e drejta e votës të atyre që jetojnë jashtë territorit ka qenë kushti i vetëm që i kemi kërkuar palës tjetër dhe e kemi bërë edhe këtë kur kemi qenë në opozitë, për të përfshirë në kodin e ri zgjedhor votën e shqiptarëve. Edhe në thirrjen e fundit që bëra ne emër të PS në dy seancat e fundit të Kuvendit, është që të mblidhemi e të votojmë bashkë me opozitës Kodin Zgjedhor që adreson më së miri zgjidhjen. Ndaj në seancë tjetër të mblidhemi dhe të votojmë për këtë reformë. Këta që u merakosën kaq shumë për protestën e diasporës, duhet të bëhen bashkë me ne që të plotësojmë kërkesat e diasporës. Procesi ka qenë i vijueshëm prej kohësh me opozitën.”, tha Balla.


Teksa u pyet në lidhje me faktin se pse policia nuk dha leje për protestën, Balla tha se në Shqipëri nuk i refuzohet askujt e drejta për të protestuar  sa kohë që cdo kërkesë për protestë plotëson kriteret e nevojshme dhe të domosdoshme të përgjegjësisë të personave që marrin përsipër të organizojnë një protestë. “Pra, në cdo rast kush kërkon të organizojë protestë duhet të listojë edhe emrat e personave që kanë marrë përgjegjësinë për të organizuar protestën.” tha Balla


(ed.me/BalkanWeb)