TIRANE

Qytetarë dhe simpatizantë të opozitës nga rrethet janë nisur në orët e para të mëngjesit të sotëm drejt kryeqytetit për të marrë pjesë në protestën e organizuar nga opozita e cila zhvillohet në orën 11:00 para Kryeministrisë.


Ish deputeti i Fierit: Policia tenton të pengojë protestuesit  


Nisja e protestuesve nga qyteti i Fierit ka filluar që në orën 7:00 të mëngjesit të kësaj të shtune. Të organizuar me automjete e furgone, por edhe me makina private drejt kryeqytetit. Kreu i PD Fier, ish deputeti Luan Baci thotë se disa prej pjesëmarrësve në protestë janë marrë në telefon nga policia gjatë natës për të mos qenë në proteste ditën e sotme, por të paraqiten në komisariatin e policisë në orën 9:00 te këtij mëngjesi.


Protesta e opozitës në Tiranë, nisen 10 autobusë nga Lezha

Nga Lezha mësohet se janë nisur rreth 10 autobusë drejt protestës së Tiranës. Qytetar te shumte nga qarku Lezhë do mblidhen në kryeqytetin shqiptar për të protestuar ndaj qeverisë.

VLORE

Sipas PD janë rreth 3 mijë persona që do nisen nga qyteti i Vlorës në drejtim të Tiranës. Sipas raportimeve nga gazetarët në të gjitha rrethet e vendit, numri i protestuesve të nisur drejt Tiranës, është më i madhi nga të gjitha herët e tjera. Janë 17 furgonë dhe autobusë të tjera të nisura nga Vlora. Organizmi i tyre është bërë që në orët e para të mëngjesit të sotëm.

SHKODER

Edhe në Shkodër, protestuesit janë nisur drejt Tiranës në orët e para të mëngjesit. Sipas PD në Shkodër janë rreth 6 mijë qytetarë që do marrin pjesë në protestën e Tiranës.

GJIROKASTER

Nga Gjirokastra sipas Partisë Demokratike janë nisur 400 persona dhe në të gjithë qarkun mendohet se janë 1 mijë protestues që do nisen drejt Tiranës. Gazetarja Brikena Metaj raportoi për “BalkanWeb” se nisur nga kjo e dhënë, janë mbi 2000 qytetarë të nisur nga gjithë qarku i Gjirokastrës.

BERAT

Nga qarku i Beratit janë nisur rreth 8 autobusë nga Berati dhe 3 autobusë nga Ura Vajgurore. Sipas PD në këtë qark, janë rreth mbi 3 mijë protestues që pritet të nisen drejt Tiranës.

ELBASAN

700 protestues janë nisur që në orën 8 të mëngjesit të sotëm nga Elbasani dhe pritet të vijnë edhe të tjerë në mënyrë të organizuar. Nga Cërriku, gazetari Fatmir Popja tha se janë nisur rreth 300 protestues. Qytetarët janë nisur me mjete private si dhe me furgonë e autobus.

KORCE

Protestuesit e qytetit te Korçës janë nisur prej orës 2:00 të mëngjesit drejt kryeqytetit për t’u bashkuar protestës së opozitës. Sipas burimeve nga dega e partisë Demokratike në Korçë, janë nisur rreth 1500 protestues nga Korça, ndërsa raportohet te ketë patur nisje edhe nga qytete te tjera te qarkut të Korçës si Devolli, Kolonja, Pogradeci. Nisja e tyre drejt Tiranës është bërë me autobusë, mikrobuze dhe mjete të vogla.

Numri i protestueseve nga rrethet sipas PD:

Qarku Shkodër – 9200
Qarku Lezha – 7000
Qarku Kukës – 4100
Qarku Dibër – 3500
Qarku Durrës – 9500
Qarku Elbasan – 7800
Qarku Berat – 3400
Qarku Fier – 5600
Qarku Vlorë – 5000
Qarku Gjirokastër – 2000
Qarku Korçë – 4500

(BalkanWeb)

Etiketa: