Mijëra njerëz u mblodhën në Beograd për të kujtuar bombardimet e NATO-s në 1999. Ata gjithashtu protestuan kundër ndërtimit të një kompleksi luksoz nga kompania e investimeve të Jared Kushner, dhëndrit të Donald Trump në atë zonë. Studentët dhe shumica e qytetarëve serbë, siç kanë treguar të gjitha sondazhet, nuk pajtohen me vendimin e qeverisë për t’i dhënë hapësirë familjes Trump. Kjo ndërtesë ishte monument i trashëgimisë kulturore që nga viti 1984 dhe qeveria serbe, për të realizuar transaksionin me Kouchner, vendosi ta deklasifikojë atë.
Serbia ka shënuar një sërë tubimesh antiqeveritare muajt e fundit, pas 16 vdekjeve nga shembja e çatisë së një stacioni hekurudhor, që solli akuza ndaj qeverisë për korrupsion dhe neglizhencë. Protestat janë shtuar duke përfshirë studentë, mësues dhe fermerë, të gjithë duke sfiduar Presidentin Aleksandar Vuçiç, një populist që ka qenë në pushtet për 12 vjet si kryeministër apo president.
Protesta u thirr nga studentët e Universitetit Shtetëror të Beogradit, të cilët kanë bllokuar mësimet në fakultetet e tyre që nga fillimi i dhjetorit dhe kanë udhëhequr protestat antiqeveritare për katër muajt e fundit.
Studentët protestuan para ish-selisë së ushtrisë, e cila vitin e kaluar iu dha me qira firmës së investimeve të Kushner me bazë në SHBA, Affinity Partners. “Është 26 vjetori i bombardimeve të NATO-s. Dhe ne protestojmë sepse kjo ndërtesë i është dhënë dikujt për të përfituar. “Por ajo duhet të qëndrojë këtu pasi është një dëshmi e agresionit të NATO-s,” u shpreh një student.
Dy ndërtesat u dëmtuan gjatë bombardimeve të NATO-s në Jugosllavinë e atëhershme, që përfshinte Serbinë dhe Malin e Zi, për të ndalur vrasjen e shqiptarëve etnikë nga policia.
Ndërtesat janë projektuar nga arkitekti serb Nikola Dobroviç dhe janë ndërtuar midis viteve 1957 dhe 1965. Dizajni i tyre ka për qëllim t’i ngjajë një kanioni të lumit Sutjeska në Bosnjën Lindore, ku një nga betejat kryesore të Luftës së Dytë Botërore u zhvillua në 1943.
Dhëndri i Trump ka në plan të ndërtojë dy rrokaqiejt në vendin e bombarduar, me një hotel luksoz, qendër tregtare, apartamente dhe zyra.
(BalkanWeb)
