TIRANË
Kur protesta e madhe është paralajmëruar nga opozita me 16 shkurt, në këto momente, një tjetër protestë po zhvillohet para godinës së bashkisë së Tiranës.
Dhjetëra qytetarë kanë kërkuar largimin e kreut të bashkisë së Tiranës, Erion Veliajt dhe kryeministrit Edi Rama, ndërsa u shprehën se politikanëve të korruptuar iu ka ardhur dita për t’u larguar nga vendi.
Me pankarta në duar “E duam bashkinë pa Erion Velinë”, “E duam Shqipërinë pa Edi Ramën, “E duam Shqipërinë pa Erion Velinë” si dhe “Rama e Veliaj të ikin nga Shqipëria”, ata u shprehën se përballja e madhe me qeverinë do të jetë ajo e 16 shkurtit.
Qytetarët e Tiranë i janë përgjigjur thirrjes së opozitës, duke protestuar në qendër të Tiranës. Për më shumë se 30 minuta, protestuesit kanë bllokuar rrugën mes bashkisë së Tiranës dhe Teatrit Kombëtar, duke hedhur parulla kundër qeverisë, si shkaktare për jetën gjithnjë e më të vështirë e më të shtrenjtë në Tiranë.
Në fjalën e tyre, qytetarët u shprehën se në Tiranë jetojnë vetëm ata që kanë lidhje me qeverinë dhe bashkinë e Tiranës, ndërsa të tjerët kanë zgjedhur arratinë si të vetmen alternativë, pasi nuk ka zgjidhje tjetër. Pas bllokimit të rrugës, protestuesit dhe qytetarët i janë bashkuar edhe protestës së “Aleancës për Mbrojtjen e Teatrit”.
