Një raport i ri i UN Women ka theksuar ndikimin e COVID-19 në sigurinë e grave në shtëpi dhe në hapësira publike.

Pothuajse gjysma e grave raportuan se kanë përjetuar një formë dhune që nga fillimi i pandemisë COVID-19, sipas raportit. Dhuna ndaj grave gjatë COVID-19, bazohet mbi të dhënat e anketës nga 13 vende.

Rreth një e katërta e grave ndiheshin më pak të sigurta në shtëpi, ndërkohë që konflikti ekzistues u rrit brenda familjeve që nga fillimi i pandemisë, sipas raportit, të publikuar në prag të Ditës Ndërkombëtare për Eliminimin e Dhunës ndaj Grave, e cila bie në 25 nëntor (sot).

Kur gratë u pyetën pse ndiheshin të pasigurta në shtëpi, ato përmendën abuzimin fizik si një nga arsyet (21 përqind). Disa gra në mënyrë specifike raportuan se ishin lënduar nga anëtarët e tjerë të familjes (21 përqind) ose se gra të tjera në familje po lëndoheshin (19 përqind).

Jashtë shtëpive të tyre, gratë po ndiheshin gjithashtu më të ekspozuara ndaj dhunës, me 40 përqind të të anketuarve që thanë se ndiheshin më pak të sigurta duke ecur vetëm gjatë natës që nga fillimi i COVID-19. Rreth 3 në 5 gra menduan gjithashtu se ngacmimi seksual në hapësirat publike u përkeqësua gjatë COVID-19.

Faktorët e stresit socio-ekonomik si presioni financiar, papunësia, pasiguria ushqimore dhe marrëdhëniet e tensionuara familjare u dalluan se kishin një ndikim të rëndësishëm jo vetëm në përvojat e sigurisë (ose dhunës), por edhe në mirëqenien e grave në përgjithësi.

“Dhuna kundër grave është një krizë ekzistuese globale që lulëzon pas krizave të tjera. Konflikti, fatkeqësitë natyrore të lidhura me klimën, pasiguria ushqimore dhe shkeljet e të drejtave të njeriut, të gjitha kontribuojnë që gratë dhe vajzat të jetojnë me një ndjenjë rreziku, madje edhe në shtëpitë e tyre, lagjet, apo komunitetet”, tha në një deklaratë për shtyp Drejtoresha Ekzekutive e UN Women, Sima Bahous. “Pandemia COVID-19, e cila kërkoi izolim dhe distancim shoqëror, mundësoi një pandemi të dytë, në hije të dhunës ndaj grave dhe vajzave, ku ato shpesh gjendeshin në izolim me abuzuesit e tyre. Të dhënat tona të reja nënvizojnë urgjencën e përpjekjeve të bashkërenduara për t’i dhënë fund kësaj .”