TIRANE- Ambasada e Gjermanisë në Tiranë ka reaguar ditën e sotme lidhur me disa raportime se azilkërkuesit që pranojnë të kthehen vullnetarisht në Atdhe përfitojnë një shumë prej 600 eurosh.

Sipas një njoftimi zyrtar të Ambasadës Gjermane thuhet se këto raportime janë të gabuara, dhe se 600 eurot janë dhënë vetëm për një kohë të limituar në korrik për shkak të mungesës së akomodimeve për azilantët.

“Në shumë media shqiptare është raportuar ditët e fundit se Qarku Federal Lörrach në Gjermani do t‘i paguante azilkërkuesve që vijnë nga vendet e Ballkanit, nëse këta do të tërhiqnin aplikimin për azil dhe do të ktheheshin vullnetarisht në atdheun e tyre. Qarku Federal Lörrach Ju vë në dijeni për faktin se ky informacion është i gabuar. Informacioni i vërtetë është se në fillim të korrikut 2015, për azilkërkuesit nga Ballkani, u bë oferta e mëposhtme unike dhe e limituar në kohë: Personat, të cilët kanë tërhequr aplikimin e tyre për azil deri më 24 korrik 2015 dhe do të dalin nga Gjermania deri më 14 gusht 2015, mund të marrin një mbështetje financiare nga Qarku Federal Lörrach”, thuhet në deklaratë.

REAGIMI I PLOTE
Nuk ka „para për kthim“ për azilkërkuesit!

Ambasada Gjermane informon mbi reagimin e Qarkut Federal Lörrach në Gjermani në lidhje me lajmet dhe artikujt e shfaqur në mediat shqiptare.

Qarku Federal Lörrach: Në shumë media shqiptare është raportuar ditët e fundit se Qarku Federal Lörrach në Gjermani do t‘u paguante para azilkërkuesve që vijnë nga vendet e Ballkanit, nëse këta do të tërhiqnin aplikimin për azil dhe do të ktheheshin vullnetarisht në atdheun e tyre. Qarku Federal Lörrach Ju vë në dijeni për faktin se ky informacion është i gabuar.

Informacioni i vërtetë është se në fillim të korrikut 2015, për azilkërkuesit nga Ballkani, u bë oferta e mëposhtme unike dhe e limituar në kohë:

Personat, të cilët kanë tërhequr aplikimin e tyre për azil deri më 24 korrik 2015 dhe do të dalin nga Gjermania deri më 14 gusht 2015, mund të marrin një mbështetje financiare nga Qarku Federal Lörrach. Kjo ofertë nuk është më e vlefshme që prej datës 24 korrik 2015. Në të ardhmen nuk do të ketë shpërblim në para në rast kthimi vullnetar në atdhe.

Me këtë aksion synohej të pengohej akomodimi i detyruar i azilkërkuesve në salla dhe çadra. Megjithatë situata e akomodimit të azilkërkuesve në të gjithë Gjermaninë muajt e fundit është përkeqësuar në mënyrë dramatike, aq sa dhe Qarku Federal Lörrach është i detyruar t’i strehojë azilkërkuesit e tjerë në vazhdim në çadra dhe palestra.

Për azilkërkuesit, strehimi në këto qëndra të improvizuara në kushte urgjence, shoqërohet jo vetëm me rrethana banimi shumë të ngushta dhe mungesën e hapësirës private por edhe me reduktimin e kuotës në para, pasi për shkak të shpërndarjes së ushqimit në mënyrë të përqëndruar, hiqet pagesa në para për ushqim për azilkërkuesit.

(b.e/BalkanWeb)