TIRANE- Nënkryetari i Grupit Parlamentar Socialist, Taulant Balla, ka reaguar ndaj deklaratave të kandidates së opozitës për kryetare e bashkisë së Durrësit, Grida Duma. Pas akuzave të PS dhe listës së kësaj partie me kandidatë të inkriminuar të PD-së, Duma ka reaguar duke i cilësuar ato një sajesë. Por deputeti i PS, Taulan Balla ka reaguar sërish duke i kërkuar Dumës që “të tregojë si ka shitur apartamente nga dy herë”, ndërsa e akuzon atë se ka probleme me drejtësinë.
“Dëgjova shqetësimin e zonjës Duma e cila duke vetëkonsideruar veten akademike, përjashton mundësinë që të jetë dhe e inkriminuar. Në të vërtet para se të na tregoj historinë e saj si akademike, zonja Duma të dëshmoj para shqiptarëve historinë e mashtrimit të saj dhe ortakut të saj në biznes ndaj qytetarëve, që u kanë shitur nga dy herë apartamente. Mashtrim për të cilin prokuroria i ka konsideruar fajtorë, duke vuajtur dënimin me burg partneri i saj, i cili është në cilësinë e administratorit të kompanisë.
Nëse zonja Duma kërkon të jetë transparente le t’u shpjegojë durrsakëve dhe historinë e futjes së saj në biznesin e ndërtimit si ortake, pa pasur as kapital dhe as njohuri në fushën e ndërtimit. Ne ende nuk dimë cilat janë asetet e Gridës që kanë detyruar një biznesmen ta bëj ortake në biznesin e ndërtimit dhe që në fund e çoi drejt dyerve të burgut. Për më tepër një biznesmene ndërtimi e akuzuar për mashtrim, tani kërkon të bëhet kryetare bashkie, duke u lavdëruar me biografinë e saj si ndërtuese mashtruese”.
Më tej, nënkryetari i Grupit Parlamentar Socialist i kërkon Dumës që të tregohet transparente me zgjedhësit e Durrësit.
“Po ashtu nëse ka dëshirë të jetë transparente zonja Duma mund të flas se si u përfshi në një operacion financiar me një bankë tjetër për të shlyer problemin e mashtrimit me kompaninë e saj, çfarë pasurish ka vënë si barrë hipotekore dhe nëse është nën hetim për këtë çështje apo jo.
Fakti që është vetëshpallur akademike, nuk e bën të pafajshme. Edhe Xhelal Mziu është vetëshpallur akademik, bile dhe Doktor Shkencash, por është në një listë me zonjën Duma, si i dënuar nga drejtësia.
Zonja Duma nuk ka problem me Partinë Socialiste, por me drejtësinë. Nuk e ka çuar në prokurori dhe gjykatë PS, por ish ortak të saj, të cilëve u ka hyrë në pjesë në bizneset e tyre familjare dhe tani është duke pastruar historitë e saj. Kur të mbaroj të na njoftoj, por deri atëherë bën mirë të hesht!”, tha Taulant Balla.
(el.sp/BalkanWeb)
