280 milionë euro! Kaq është shifra që Real Madridi do t’i ofrojë Paris Sën Zhërmenit në verë për Kilian Mbape, shkruan “France Football”. Zinedin Zidan, i rikthyer së fundmi në stolin e “los Galacticos”, ka zgjedhur sulmuesin e Paris Sën Zhërmenit si elementin e duhur për të ndërruar manovrën ofensive të së ardhmes.
Pikërisht ai, adoleshenti i tmerrshëm, është kërkesa për të përforcuar skuadrën në sezonin e ri.
Revista franceze siguron se tratativat do të nisin javët e ardhshme dhe do të përbëjnë telenovelën më të nxehtë të verës. Reali kishte provuar dhe në vitin 2017 të merrte Mbapen, por asokohe sulmuesi i Monakosë preferoi të shkonte në Paris.
Dy vjet më pas, madrilenët rikthehen në sulm dhe do të shfrytëzojnë në maksimum vështirësitë e klubit francez me Fair-Playn Financiar, me sheikët që duhet të arkëtojnë 150 milionë euro për të larguar nga koka hijen e rëndë të UEFA-s.
(j.s/BalkanWeb)
