Turqia po përballet me një krizë të rëndë ekonomike, ndërsa presidenti Rexhep Tajip Erdogan intensifikon goditjet ndaj opozitës. Lira turke ka rënë në një nivel historikisht të ulët prej 42 për dollar, duke shënuar rënien më të madhe ditore që nga korriku 2023. Në të njëjtën kohë, tregjet financiare kanë pësuar një tronditje të fortë, me aksionet dhe obligacionet turke që po shemben mes pasigurive të tregut.

Kriza u përshkallëzua pasi Erdogan urdhëroi arrestimin e Ekrem Imamoglu, kryetarit të bashkisë së Stambollit dhe rivalit të tij kryesor politik. Opozita e ka cilësuar këtë veprim si një “përpjekje për grusht shteti” dhe një strategji për të eliminuar kundërshtarët kryesorë përpara zgjedhjeve. Imamoglu ishte konsideruar si kandidati më i fortë për të sfiduar Erdoganin, por tani përballet me një sulm të drejtpërdrejtë nga regjimi.

Pas arrestimit të Imamoglu, lira turke pësoi një humbje drastike prej mbi 12.7%, ndërsa Banka Qendrore e Turqisë u detyrua të ndërhynte me shitje masive të rezervave valutore – një përpjekje e pasuksesshme për të stabilizuar monedhën.

Bursa e Stambollit u godit rëndë, me një rënie prej 6% të aksioneve kryesore dhe një kolaps të sektorit bankar me 9.67%. Kjo detyroi autoritetet të pezullonin përkohësisht tregtimin për të shmangur një rrëzim të plotë të tregjeve. Investitorët e huaj po tërhiqen me ritme alarmante, duke rritur frikën për një krizë financiare në përshkallëzim.

Ekspertët fajësojnë politikat e Erdoganit për këtë krizë, duke theksuar se ai ka ndjekur strategji ekonomike joortodokse që kanë nxitur inflacionin dhe kanë shkatërruar besimin e tregjeve. Për vite me radhë, ai ka manipuluar financat publike dhe ka ndërhyrë në Bankën Qendrore, duke minuar stabilitetin ekonomik.

Me krizën në rritje dhe represionin politik që intensifikohet, Turqia po shkon drejt një pike pa kthim. Arrestimi i Imamoglu dhe sulmi ndaj opozitës tregojnë se Erdogan është i gatshëm të sakrifikojë stabilitetin ekonomik dhe politik të vendit për të mbajtur pushtetin me çdo kusht.