Karabinierët italianë në Rho kanë arrestuar dy shtetas shqiptarë, të moshës 34 dhe 22 vjeç, të akuzuar për rrëmbim dhe plagosje të një të mituri 17-vjeçar. Ngjarja, e ndodhur vitin e kaluar, ishte shoqëruar me dhunë, dhe autorët kanë një histori kriminale të lidhur me trafikun e drogës. Prokuroria e Milanos kishte nisur hetimet pas një denoncimi nga i mituri, i cili akuzonte dy të dyshuarit për plagosje dhe rrëmbim, ngjarje që kishin ndodhur më 1 prill të vitit të kaluar.

Nëpërmjet dëshmive të mbledhura dhe verifikimit të imazheve të kamerave të sigurisë, u konstatuan detaje të ngjarjes. I mituri, një student, u ndalua papritmas nga dy të dyshuarit në një rrugë dytësore. Ata e goditën atë me një shkop bejsbolli dhe e kërcënuan me armë zjarri, duke e detyruar të pranojë se kishte dëmtuar makinën e tyre dhe kishte vjedhur kokainë nga brenda saj.

Gjatë bastisjes në shtëpinë e njërit prej të dyshuarve, karabinierët gjetën rreth 250 gramë kokainë dhe 5000 euro para të gatshme. Të dy shqiptarët po mbahen në paraburgimin e San Vittore në Milano, pas një urdhri të gjykatës.

(Balkanweb)