Krahas studentëve të cilët kanë hyrë sot në ditën e nëntë të protestës, edhe sot të shumtë ishin banorët që kanë bllokuar disa akse rrugore në disa qytete të Shqipërisë.
Ata kundërshtojnë rritjen e taksave dhe të çmimit të karburantit dhe për këtë bëjnë përgjegjëse qeverinë e drejtuar nga kryeministri, Edi Rama.
Një protestë e tillë po zhvillohet në këto momente në Shkodër, Berat, Durrës si dhe në Fushë-Krujë teksa me pankarta të ndryshme, protestuesit kanë kërkuar edhe largimin nga detyra të kryeministrit Rama. Ky tubim mbështetet nga Partia Demokratike, protesë kjo e cila ka filluar prej disa ditësh, ndërsa veprimet e tyre janë shoqëruar me thirrje të ndryshme.
Gazetarët e “BalkanWeb” dhe të “News 24” kanë raportuar nga të gjitha qytetet ku po mbahen protesta të tilla, ndërsa siç shprehen ata, protestuesit kanë dalë në rrugë për shkak të kostos së lartë të jetesës, e cila nuk përballohet dot prej tyre.
Në Berat protestuesit bllokuan rrugën me pankarta “Mjaft premtime boshe” dhe “Stop rritjes së naftës”. Gjithashtu në Shkodër banorët kanë bllokuar rrugët hyrëse të qytetit duke djegur edhe goma, ndërsa pjesë e bllokimit është bërë edhe një mjet i policisë.
(n.m/BalkanWeb)
