Për të parën herë që nga nisja e luftës në Ukrainë në shkurt të vitit 2022, ministri i Jashtëm rus, Sergej Lavrov do të vizitojë një vend të Bashkimit Europian muajin e ardhshëm.
Sipas medias ruse Vedomosti, më 5 dhe 6 dhjetor, kryediplomati i Moskës do të vizitojë Maltën për të marrë pjesë në një takim të Këshillit të Ministrave të Jashtëm të OSBE-së.
Është zëdhënësja e Ministrisë së Jashtme të Rusisë Maria Zakharova ajo që ka konfirmuar për Vedoimosti udhëtimin e Lavrov për në ishull, ndërsa Ambasada e Maltës në Rusi tha se ftesat për takimin e 5 dhe 6 dhjetorit “do t’u dërgohen të gjitha delegacioneve të OSBE-së në kohën e duhur”.
Teksa Brukseli ka vendosur sanksione ndaj Lavrov për rolin e tij në luftë, unioni nuk mori guximin të vendoste një ndalim udhëtimi për shefin e diplomacisë ruse, duke kërkuar të linte të hapur një kanal komunikimi me të.
Hera e fundit që Lavrov vizitoi një vend të BE-së ishte për çudi një udhëtim në Stokholm, po për një mbledhje të OSBE-së në dhjetor 2021, ku ai u takua edhe me Sekretarin amerikan të Shtetit, Antony Blinken. Kujtojmë se në vitin 2023, Lavrov udhëtoi për në Maqedoninë e Veriut për një takim ministror të OSBE-së, pasi Bullgaria dha lejen që avioni i tij të kalonte hapësirën e saj ajrore gjatë rrugës për në Shkup.
Vendimi i Sofjes zyrtare ngjalli kritika nga Kievi, me disa vende, duke përfshirë Ukrainën, Letoninë, Estoninë dhe Lituaninë që zgjodhën të bojkotojnë takimin për shkak të pjesëmarrjes së Lavrov.
