E ardhmja e Salah po kthehet në një telenovelë të vërtetë, kjo pasi palët e përfshirë, klubi, trajneri, por dhe vetë lojtari japin versione të ndryshe në kohë të ndryshme. Fakt është që më 30 qershor të këtij vitit sulmuesin egjiptian i përfundon kontrata. Trajneri Slot kërkon që Salah të qëndrojë në skuadër, por ishte i qartë teksa theksoi se rinovimi i tij do t’i kushtojë klubit miliona euro, ndërkohë as vetë Salah nuk ishte i qartë kur u pyet mbi këtë temë për të di satën herë:

“Mendoj vetëm të fitojë Premier League, të shohim në fund të sezonit. E vetmja gjë që dua është që tifozët të më kujtojnë si një person që ka dhënë gjithçka në këtë tetë vite”, u shpreh Salah.

Jo vetëm Salah, e pa qartë është edhe e ardhmja e Darwin Nunez. Liverpool investoi 85 milionë euro për ta marrë nga Benfika, si një kundërpërgjigje ndaj Haaland, por këtë rol uruguaiani nuk e ka bërë thuajse kurrë, ndërsa me Slot në stol po e sheh veten gjithnjë e më larg fushës. Trajneri i Liverpool nuk u kursye as përpara mediave duke theksuar se është i pakënaqur me angazhimin e tij në stërvitje.

Sipas mediave angleze është e qartë që mes tij dhe trajnerit ka një krisje të fortë. Në fakt, Nunez ishte shumë pranë një kalimi në Arabinë Saudite gjatë muajit janar tek ekipi i Al Nassr, një pistë që pritet të rihapet sërish në fund të këtij sezoni.

(BalkanWeb)