Kryetari i Partisë Demokratike, Sali Berisha, në një konferencë për shtyp, foli për dënimin me burg të deputetit Ervin Salianji.
Ai u shpreh se nata e parë e kaluar nga Salianji në qeli, ishte një natë e zezë për të gjithë ata shqiptarë që besonin tek e vërteta. Sipas tij, të vetmit që kanë festuar për dënimin e deputetit demokrat janë ish-ministri i Brendshëm dhe vëllai i tij që u denoncua nga Salianji.
“Një deputet i ri e guximtar që nuk ka patur ndonjëherë poste të rëndësishme zyrtare përveç detyrës e misionit fisnik të besuar nga qytetarët dhe PD si deputet he nënkryetar grupi. U burgos me urdhër të Ramës në një hark kohor maksimalisht të shkurtër nga dhënia e verdiktit anti-kushtetues e anti-ligjor të gjykatës së kontrolluar prej tij.
Kjo natë të cilën Salianji e kaloi në qelitë e burgut, vetëm se guxoi t’u thotë shqiptarëve të vërtetën e vëllazërisë famëzezë Xhafaj të lidhur kokë e xhep me Ramën, është një natë e zezë për të gjithë shqiptarët të cilët besojnë tek e vërteta. Ishte natë feste për vëllezërit Xhafaj dhe të gjithë vëllazëritë e mafias e drogës në Shqipëri”, u shpreh ai.
(BalkanWeb)
