Avokati i kompanisë që shpërndau filetot e pulës, Gentian Rumano, i ftuar në emisionin “Open” në News 24, ka folur lidhur me shqetësimet për prani të salmonelës në produkte ushqimore. Ai theksoi se produktet janë marrë për kontroll dhe janë realizuar analizat, të cilat kanë konfirmuar se kontrolli është i kënaqshëm.
Sipas Rumanos, Autoriteti Kombëtar i Ushqimit ka pasur detyrimin që të informonte kompaninë brenda 5 ditëve për rezultatet e analizës. Ai shtoi se, pasi nuk ka pasur asnjë njoftim nga AKU për pesë ditë, kompania ka vazhduar shitjen e produktit, pasi nuk ishte njoftuar për ndonjë rezultat negativ ose urdhër bllokimi nga ana e AKU-së.
Rumano shpjegoi se kontrolli rutinë nuk është një veprim i bazuar mbi dyshime, dhe për sa kohë që nuk kishte asnjë dyshim të konfirmuar, kompania nuk kishte arsye të ndërpriste shitjen e produkteve.
Gentian Rumano, avokat i kompanisë: Produkti është marrë dhe janë marrë monstra. Është përcaktuar që kontrollet janë të kënaqshme. Kontrolli rutinë nuk është kontroll që bëhet mbi bazë të dyshimeve, e duke qenë se nuk ka dyshime, e AKU ka detyrimin për 5 ditë të nxjerrë përfundimin dhe ta njoftojë shoqërinë. AKU nuk ka njoftuar kompaninë për 5 ditë. Shoqëria ka vijuar me shitjen e produktit, për sa kohë nuk ka pasur asnjë njoftim për 5 ditë. Nuk ka urdhër bllokimi nga AKU për shoqërinë, që mos tregtonte produktin. Salmonela mund të jetë marrë dhe gjatë transportit.
(Balkanweb)
