Evropa dëshiron të bashkëpunojë me Shtetet e Bashkuara, por BE-ja është e gatshme të përgjigjet nëse Uashingtoni nuk i lë zgjidhje duke vendosur tarifa për çelikun dhe aluminin, tha kancelari gjerman Olaf Scholz.

Duke folur në hapjen e panairit industrial të Hanoverit, i cili këtë vit ka Kanadanë si vend partner, Scholz gjithashtu këmbënguli se Kanadaja është një vend i pavarur.

Presidenti i SHBA Donald Trump ka menduar për aneksimin e Kanadasë dhe i është referuar vendit si shteti i 51-të i SHBA-së.

“Ne qëndrojmë pranë jush!” tha Scholz, duke shtuar: “Kanadaja nuk është një shtet që i përket askujt tjetër. Kanadaja është një komb krenar dhe i pavarur.”

Duke iu drejtuar planeve të Trump për të futur tarifa, Scholz tha se përgjigja e tij ndaj politikave “vendi im së pari” ishte më shumë tregti e lirë, konkurrencë më e madhe dhe më shumë sovranitet teknologjik.

Scholz argumentoi se Evropa nuk ishte naive, por gjithashtu jo e dobët, dhe tha se luftërat tregtare dëmtonin të gjitha palët.

“Kështu që unë u them Shteteve të Bashkuara: qëllimi i Evropës mbetet bashkëpunimi. Por nëse SHBA nuk na lë zgjidhje, si p.sh. me tarifat për çelikun dhe aluminin, ne si BE do të reagojmë si një”.

 

(A.A/BalkanWeb)