Jo me ritmet e vjetshme, por në këtë start të sezonit Partizani ka regjistruar një ecuri mjaft pozitive që nga ardhja në krye të stolit e Aleksandar Veselinoviç. Serbi në daljet e tij për mediat nuk harron të theksojë ecurinë e tij pa humbje, ku në 12 ndeshje numëron 6 fitore dhe po aq barazime.
Kjo ecuri ka mjaftuar edhe që “demat” të ruajnë kreun e renditjes me 27 pikë, dy më shumë se Vllaznia, ndjekësja më e afërt. Nisur nga kjo ecuri pa humbje e Veselinoviç, “Panorama Sport” i ka bërë një vëzhgim startit të trajnerëve në 12 ndeshje të epokës “Demi”, duke marrë në konsideratë vetëm ata që kanë qëndruar në krye të ekipit të paktën për 12 ndeshje, saç numëron Veselinoviç.
TË PAMPOSHTURIT – Është e vërtetë se 54-vjeçari nga Vojvodina është i pamposhtur, por nuk është i vetmi. Një ecuri të ngjashme me të në të shkuarën e ka regjistruar edhe Sulejman Starova, në dy sezone radhazi. Në sezonin 2015 “Bobi” regjistronte plot 10 fitore dhe 2 barazime në 12 ndeshje, një ecuri thuajse perfekte.
Në atë sezon seria pa humbje shkonte në plot 16 ndeshje, çka është edhe “shënjestra” që Veselinoviç duhet të arrijë për të hyrë në librat e rekordeve në këtë epokë të re për Partizanin që nga viti 2013.
Në sezonin 2016-2017 Starova rikthehej në stol dhe numëronte 6 fitore dhe 6 barazime në 12 betejat e para, teksa seria shkonte në 13 ndeshje pa disfatë. Këtë ecuri Veselinoviç mund ta arrijë nëse nuk humbet në derbin e së dielës kundër Tiranës.
Përveç Starovës dhe Veselinoviç, asnjë trajner tjetër nuk pa pasur një start pa provuar shijen e humbjes, përfshirë edhe Gegën dhe Kolelën, dy të vetmit që janë shpallur kampion. Në statistikat e marra nga “Transfermarkt” jemi bazuar vetëm në ndeshjet e Superiores.
TË TJERËT – Kjo dyshe sa i përket kësaj statistike ka lënë pas shumë trajnerë të tjerë, që kanë korrur sukses gjatë karrierës. Në këtë listë janë emra si Hasan Lika, Shpëtim Duro, Ilir Daja apo Orges Shehi.
Të gjithë këta emra të lartpërmendur nuk kanë nisur dot pa humbje, teksa startin më të dobët e regjistron Sormani me plot shtatë humbje. Start shumë pozitiv ka regjistruar edhe Skënder Gega me plot 9 fitore, pavarësisht 2 humbjeve.
