Nuk arritën të triumfojnë në Champions League por kjo ka pak rëndësi për sheikët e Man.City, fundja ky ishte një sezon i suksesshëm ku arritën të bënin dopjetë, mbi të gjitha arritën të fitojnë titullin në Premier League. Pep Guardiola është padikustim njeriu i suksesit, një trajner që largoi çdo ofertë duke i qëndruar besnik Man.City.
Ky fakt është vlerësuar shumë nga pronarët e klubit të cilët nuk kanë ndërmend të ndalin investimet, dhurata e radhës për teknikun e tyre pritet të jetë Joao Felix. E përditshmja spanjolle “AS”, ka zbuluar se drejtuesit e Man.City janë paraqitur në dyert e Benfikës me një ofertë të çmendur, 120 milion euro për të lënë të lirë talentin e tyre. Në fakt shuma e paraqitur nga “qytetarët” përkon me klauzolën e largimit të Felix duke bërë të qartë qëllimin e tyre. Nuk kanë ndërmend të futen fare në negociata por do të paguajnë menjëherë klauzolën.
Me shumë se sa për të bindur Benfikën, kjo ofertë e Man.City është për të djegur të gjithë kandidatët e tjerë, të fundit që u paraqitën me një ofertë 80 milionëshe ishin drejtuesit e Realit Madrid. Lista e klubeve që kërkojnë shërbimet e talentit të Benfikës është e madhe, Manchester United, Juventus, Barcellona dhe Atletico Madrid.
(BalkanWeb)