TIRANE
Ditën e sotme 2 120 aplikantë do të marrin pjesë në testimin me shkrim për Patrullë të Përgjithshme. Testimi do të zhvillohet në dy faza, ku si fillim në provim do të futen aplikantët e qarqeve Tiranë, Berat, Durrës e Fier. Ndërkohë në fazën e dytë do të marrin pjesë aplikantët e qarqeve Gjirokastër, Vlorë, Elbasan, Korçë, Lezhë, Shkodër, Kukës, Dibër. Kujtojmë se në datën 3 korrik u hapën aplikimet 500 vende, për Patrullë të Përgjithshme.
Thirrjes së Policisë për t’u bërë pjesë e saj iu përgjigjën 2 120 të rinj e të reja nga gjithë vendi. Për t’u ardhur në ndihmë atyre që nuk i përmbushnin dot të gjitha kriteret deri në datën 3 gusht, Policia e shtyu afatin e aplikimeve deri në datën 15 gusht.
Ditën e djeshme, drejtori i Kolegjit Policor, Drejtues Ylli Vasili pohoi se çdo konkurrent, në fund të çdo faze konkurrimi, në rast se nuk është dakord me rezultatin, ka të drejtën e ankimimit brenda dy ditëve.
(ed.me/BalkanWeb)
