TIRANË- Avokati i Izet Haxhisë, ish-truprojës së Sali Berishës të dënuar me 25 vjet burg për vrasjen e Azem Hajdarit paraqiti sot në Gjykatën e Tiranës provat për të kërkuar rihapjen e dosjes “Hajdari” e konsideruar si “dosja e shekullit”.
Bashkim Nikolla ka deklaruar se klienti i tij është i pafajshëm, por u largua drejt Turqisë për shkak se i rrezikohej jeta.
Për të vërtetuar që emri i tij nuk përmendet si bashkëpunëtor në vrasje, avokati ka nxjerrë një shkresë të Shërbimit Informativ Shtetërot (SHIK) asokohe drejtuar kryeministrit Pandeli Majko dhe Presidentit Rexhep Mejdani.
Gazetarja Klodjana Haxhiaj ka siguruar për “BalkanWeb” dhe një kopje të kësaj shkrese, në të cilën emri i Izet Haxhisë nuk përmendet të jetë një nga vrasësit e Azem Hajdarit.
Por jo vetëm këtë, për rihapjen e dosjes së bujshme apo rivendosjen e afateve siç raporton gazetarja Klodiana Lala për “BalkanWeb” është përdorur si provë edhe një shkresë dërguar ministrit të asaj kohe të Drejtësisë, Ilir Rusmajli, i cili jepte garanci autoriteteve turke se subjektit Izet Haxhiaj do t’i jepej e drejta për tu rigjykuar në shtetin shqiptar.
Avokati i Haxhisë iu referua edhe së ashtuquajturës “Marrëveshja e Rognerit”, në bazë të së cilës klienti i tij pretendon se ka pasur një skenar të qartë për ta eleminuar fizikisht, e për të cilën akuzoi drejtpërdrejt Sali Berishën.
Prokurori i çështjes deklaroi se avokati nuk paraqiti asnjë provë për të kërkuar rihapjen e dosjes dhe se kërkesa e tij ishte e pabazuar. Mësohet se gjykatësi i dha shtatë ditë mbrojtjes për të mbledhur të tjera prova deri më datë 14 qershor për të dalë me një vendim.
(m.a/BalkanWeb)