Nga data 15-18 gusht në Meksikë do të zhvillohet “Olimpiada e Robotikës” ku pjesmarrës do të jenë 160 vende, ndër të cilët edhe Shqipëria. Vendi ynë përfaqësohet nga një grup nxënësish të pasionuar të cilët kanë ndërtuar robotin “Kastrioti 1”.
Nxënësit, të ftuar në studion e lajmeve të “News 24”, kanë folur për vështirësitë e ndërtimit të këtij roboti si dhe kanë treguar atë se çfarë presin nga kjo garë në Meksikë.
“Ne kemi filluar që nga muaji maj me punën, në fillim ishte sasia, ndërtuam mekanizmin lëvizës, kemi punuar me mbledhësin dhe më pas me krahun që do të kapë panelet diellore.
Me cilët pjesë patët më shumë problem? Më shumë problem patëm me motorët, por edhe dizajni ka qenë një sfidë. Pika më e lartë është 60 cm, pra duhet të ketë madhësinë e caktuar. Ndaj ndërtuam edhe një mekanizëm të tillë, në fillim ishte 50 cm me 50 cm, dhe pastaj nisi zgjerimi,”- tregoi Dea Rrozhani, njëra prej nxënësve që ka ndërtuar robotin.
Megi Dauti, një tjetër nxënëse, tregoi për vështirësitë që pret në zhvillimin e Olimpiadës në Meksikë: “Pjesa më e vështirë do të jetë bashkëpunimi me grupet e tjera. Ne nuk i njohim ata dhe mendoj se kjo do të jetë problem.”
Kristi Leka, një nga djemtë e grupit të apasionuar u shpreh: “Pjesa më e vështirë është të qenit aty në Meksikës, në syrin e shumë njerëzve. Emocionet mund të bëjnë të vetën. Duhet ta fitosh me patjetër raundin dhe për këtë duhet të jesh më i qetë.”
Në grupin me 4 nxënës që ka ndërtuar robotin “Kastrioti 1” ishte edhe Julianna Schneider. “Ne po konkurrojmë ne programin e First Global”- tha Julianna Schneider, anëtarja e ekipit shqiptar e cila rrëfeu për garën dhe çfarë përfaqëson ky aktivitet ku Shqipëria merr pjesë. Julianna tregoi për bashkëpunimin me ekipin e Kosovës gjithashtu pjesëmarrës në lojërat olimpike që zhvillohen në Meksikë. “Përveç pjesës teknike, marrja e kubave mendoj që do të jetë pak e vështirë sepse do të jetë një fushë e madhe ku do të luajnë robotët dhe do të jenë 6 robotë dhe duhet shumë përqendrim nga ai që drejton robotin për të parë gjithçka”.
(e.k/BalkanWeb)
