KOSOVË- Kuvendi i Kosovës mban sot një seancë plenare kushtuar 27 prillit, Ditës së Personave të Pagjetur të Luftës.

Pas seancës, në kuadër të shënimit të Ditës së të Pagjeturve, është paralajmëruar të zbulohet një përmendore dedikuar personave të pagjetur që nga lufta e vitit 1999 në Kosovë.

Së fundmi, Prokuroria për krime lufte e Serbisë, ka bërë hulumtimin e një varreze të mundshme në rrethinën e Novi Pazarit, në fshatin Kozarevë, në afërsi të lumit me të njëjtin emër.

Gërmimet vlerësuese kanë nisur në bazë të disa hetimeve, të cilat i kanë bërë zyrtarët e kësaj prokurorie.

Zyrtarët e Komisionit qeveritar për personat e pagjetur në Kosovë, të cilët kanë qenë të ftuar nga autoritetet serbe që të vëzhgojnë gërmimet, kanë theksuar se punimet janë ndërprerë, për shkak se kanë rezultuar të pasuksesshme dhe vend-gërmimi nuk përputhej me informacionet që kishte pala e Kosovës lidhur me varrezën eventuale masive, ku dyshohet të jenë varrosur civilët shqiptarë, të vrarë gjatë luftës në Kosovë.

Megjithatë, ata thanë se tashmë ky proces i gërmimeve vlerësuese ka nisur në Kozarevë të Novi Pazarit, dhe ai do të duhej të vazhdojë edhe më tutje.

Fati i personave të pagjetur mbetet një nga plagët më të rënda të luftës së fundit. Sipas shifrave zyrtare, janë mbi 1,600 persona nga Kosova, fati i të cilëve mbetet i pazgjidhur.

Ndërkohë Kryeministri i Kosovës, Isa Mustafa me rastin e ditës së të pagjeturve është zotuar se qeveria e tij do t’i shfrytëzojë të gjitha institucionet ndërkombëtare për ta kërkuar zbardhjen e të pagjeturve, kthimin e tyre si dhe për t’i dënuar kriminelët që kanë kryer këto krime.

Ai ka kërkuar përgjegjësi nga Serbia për zhdukjen e njerëzve të Kosovës dhe për krimet monstruoze që forcat ushtarake e paramilitare serbe i kanë kryer gjatë luftës së fundit në Kosovë.

“Ata që bënë krime, duhet të dalin para drejtësisë”, ka shkruar ndër të tjera në Facebook Mustafa.

(m.k/BalkanWeb)