KOSOVË


Shefi i Grupit Parlamentar të Lëvizjes Vetëvendosje Glauk Konjufca ka kërkuar që të mblidhet me urgjencë Këshilli i Sigurisë së Kosovës, pas lajmit se ne zyrën e Presidentit të Kosovës është punësuar Branislav Nikoliç.


Konjufca shkruan se punësimi i një spiuni serb përbën rrezikim të sigurisë kombëtare.


Shkrimi i Glauk Konjufcës:

Janë krijuar kushtet që të mblidhet me urgjencë Këshilli i Sigurisë i Kosovës. Sepse në zyrën e Presidentit të shtetit është punësuar Branisllav Nikoliç. Sipas mediave, ky njeri është pjesëtar i shërbimit shtetëror informativ serb. Kjo përbën pa dyshim rrezikim serioz të sigurisë kombëtare.

Sipas kushtetutës sonë (neni 94, pika 5, lidhur me nenin 127, pika 2) Këshillin e Sigurisë e kryeson kryeministri i vendit. Çka ka kryeministri që nuk e thërret mbledhjen? Mos ndoshta frikësohet nga presidenti që ia përmend bodrumin e Radojčić-it ku u themelua qeveria e tanishme? Çfarë çifti i tmerrshëm Thaçi-Haradinaj: reciprokisht të shantazhueshëm përmes veglave të Vučić-it.

 (d.xh/Balkanweb)