Në murin e dhomës kanë varur flamurin shqiptar. Por arsyet për t´u krenuar me të zbehen sapo kalon nga njëra dhomë në tjetrën. Flasim për konviktet në Qytetin Studenti.


Protesta studentore e dhjetorit solli në vëmendje problematikën në dukje të harruar të konviketeve, por ndërsa për të heshtet, jo pak të rinj shqiptarë jetojnë brenda atyre dhomave. Ato ditë shprese ikën shpejt dhe në konvikte pak gjëra kanë ndryshuar. Emiljando është student i vitit të dytë, ai rrëfen se burgjet shqiptare janë më të mira se konviktet.



“Kushtet në konvikt janë aq skandaloze, sa edhe po t´i krahasojmë me burgjet, burgjet janë më mirë. Në burg, shteti shqiptar paguan minimalisht 20 mijë lekë të vjetra për të mbajtur një të burgosur, ndërsa studentët paguajnë 45 mijë lekë në muaj dhe marrin në këmbim godine të viteve 1945, të cilat janë nën kushtet minimale. Jemi në një situate ku edhe kafshët nuk pranohen në shqipëri. DO ndalohej që studentët të jetonin në këto dhoma”, thotë Emiljando për emisionin “Trending” në News 24.

Nga një vështrim sipërfaqësor i Qytetit Studenti shenjat e një ndryshimi janë të dukshme, fasadat kanë nisur të ndryshojnë. Por Emiljando thotë që ndryshimi ka mbetur vetëm në fasada.

“Në QS ka shumë godina por janë rikonstruktuar vetëm disa. Për propagandë dhe për të shuar kritikat. Jashtë duket mirë por brenda janë më keq. Më shqetëson fakti që studentët i kanë pranuar këto kushte”, rrëfen Emiljando.

“Të varfërit nuk mund të arsimohen”. Ky është konkluzioni i Emiljandos. Ai thotë se çdo zgjidhje është sipërfaqësore, pasi rrënjët e të keqes janë te Ligji i arsimit.

“Kemi të bëjmë me një ligj që është formuluar nga partitë politike dhe ky ligj është bërë për të tjerët jo për studentët. Ky ligj bën të mundur që vetëm studentët e pasur të arsimohen. Unë jam në vit të dytë dhe kur shoh brezat që vijnë ka shumë studentë me probleme të thella ekonomike”, ka deklaruar Emiljando.

Por a janë plotësuar kërkesat e studentëve? Sigurisht që jo. Studentët ende nuk janë pajisur me kartën e studentëve, ndërsa ata kanë frikë se VKM-të janë vetëm momentale.

“Kërkesat tona nuk janë plotësuar. Me disa VKM ligji ndryshon sërish. Protesta u shua me një politikë mashtruese”, thotë Emiljando.

Një qytet vetëm për sdudentët, a nuk do të ishte ky vendi më i gjallë në Tiranë? Do duhej, por rrugëve të këtij qyteti të riun s´e has shpesh.

“Unë nuk rri fare në QS. Është qytet i vdekur, një lojë domino për të moshuarit. Nuk është vend që të inspiron. Sa më larg nga godina…duan të thonë që nuk jemi nga QS. Këtu është brumi që del shpresa për ndryshim. Shikon Fytyra që nuk qeshin. Tani kemi thjesht njerëz që mendojnë të ikin sa më shpejt”, thotë ai.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: