Deputetja e PD Jorida Tabaku ka publikuar një video në rrjetet sociale, ku ka denoncuar ashpër procedurat e Korporatës së Investimeve, duke i cilësuar ato si një nga mjetet më abuzive dhe korruptive të qeverisë.

Sipas Tabakut, këto procedura kanë pasoja të rënda për ekonominë dhe për qytetarët shqiptarë, duke shkelur të drejtat e pronarëve të ligjshëm dhe duke përqendruar burimet në pak duar.

“Korporata e Investimeve po kthehet në një nga mjetet më abuzive dhe korruptive të qeverisë. Në vend që të përqendrohet në detyrat themelore të një shteti demokratik, si infrastruktura, arsimi dhe shëndetësia, shteti shqiptar ka transferuar këto përgjegjësi te koncesionet private,” theksoi Tabaku.

Tabaku, ka qenë një nga zërat kryesorë që kundërshtoi këtë ligj ne4 variantin fillestar në vitin 2019, duke arritur, falë presionit të saj dhe ndërhyrjes së faktorëve ndërkombëtarë, të realizonte disa ndryshime të rëndësishme. Ajo theksoi se përkushtimi për mbrojtjen e pronës publike dhe private ka qenë gjithnjë një prioritet në angazhimin e saj politik.

“Biznesi i lejeve të ndërtimit dhe uzurpimi i pronave publike është një proces i pandershëm dhe i korruptuar. Qeveria po shkel të drejtat e pronës dhe të pronarëve të ligjshëm të Tiranës, duke i trajtuar trojet dhe pronat si një uzurpator ordiner, ” vijoi ajo.

Deputetja e PD, Jorida Tabaku, argumentoi se transparenca, konkurrenca dhe respektimi i pronës private janë vlera themelore që duhet të udhëheqin çdo vendim qeveritar. Ajo paralajmëroi se praktikat aktuale jo vetëm që dëmtojnë ekonominë kombëtare, por edhe thellojnë pabarazinë në vend.

” Ekonomia shqiptare ka nevojë për frymëmarrje, për konkurrencë dhe për një treg të drejtë. Përqendrimi i lejeve dhe uzurpimi i pronave në duar të pakta po i sjell dëm të jashtëzakonshëm vendit tonë, ” tha Tabaku.

Në përfundim të videos, deputetja e PD-së bëri thirrje për ndërprerjen e menjëhershme të këtyre praktikave. “Jam e bindur që kjo praktikë korruptive nuk mund të tolerohet dhe pas 11 majit do të jetë një nga veprimet e para që ndalohet,” përfundoi Tabaku.

“Korporata e Investimeve po kthehet në një nga mjetet më abuzive dhe korruptive të qeverisë. Përveç marrjes së pronave publike, duke filluar nga Drejtoria Arsimore, kadastra, e së fundmi stadiumi “Selman Stërmasi”, tashmë po jepen edhe leje ndërtimi, duke e kthyer shtetin në një biznes ordiner të dhënies së lejeve. Në vend që të përqendrohet në detyrat themelore të një shteti demokratik, si infrastruktura, arsimi dhe shëndetësia, shteti shqiptar ka transferuar këto përgjegjësi te koncesionet private. Dhe tani, me dhënien e lejeve të ndërtimit dhe zhvillimin e pronave publike, po shkel të drejtat e pronës dhe të pronarëve të ligjshëm të Tiranës, duke i zaptuar trojet dhe pronat sikur të ishte një uzurpator ordiner.

Biznesi i lejeve të ndërtimit nga qeveria shqiptare është një proces abuziv, i pandershëm dhe i korruptuar.Korporata e Investimeve, si dhe vetë Ligji i Investimeve Strategjike dhe ligjet e tjera të ngjashme të hartuara sipas interesave të ngushta, duhet të pushojnë së ekzistuari. Ekonomia shqiptare ka nevojë për frymëmarrje, për konkurrencë dhe për një treg të drejtë. Përqendrimi i lejeve dhe uzurpimi i pronave në duar të pakta i sjell dëm të jashtëzakonshëm ekonomisë sonë dhe dëmton interesat e qytetarëve.

Jam e bindur që kjo praktikë korruptive nuk mund të vazhdojë pas qeverisjes socialiste. Pas 11 majit, kjo do të jetë një nga praktikat e para që duhet ndalur me patjetër”, u shpreh ajo.