Ministria e Jashtme iraniane ka hedhur poshtë pretendimet se ambasadori i vendit në OKB ka mbajtur një takim sekret me miliarderin me bazë në SHBA, Elon Musk në fillim të kësaj jave. Gjatë mandatit të tij të parë në detyrë, presidenti i zgjedhur Donald Trump ndoqi një politikë ‘presioni maksimal’ ndaj Teheranit, duke ndërmarrë hapa të shumtë armiqësor kundër Republikës Islamike.
Duke u pozicionuar si politikisht neutral përpara garës presidenciale të SHBA-së në vitin 2024, Musk deklaroi mbështetjen e tij për Trump këtë korrik dhe u shfaq si një nga donatorët kryesorë të republikanëve. Që nga zgjedhjet e 5 nëntorit, manjati i teknologjisë është parë shpesh së bashku me presidentin e zgjedhur, përfshirë gjatë bisedave telefonike me liderë të huaj në rezidencën e Trumpit në Mar-a-Lago.
Duke folur për agjencinë shtetërore të lajmeve të Iranit IRNA të shtunën, zëdhënësi i Ministrisë së Jashtme Esmail Baghaei mohoi kategorikisht “raportet e rreme” nga mediat amerikane në lidhje me një takim midis ambasadorit Amir Saeid Iravani dhe Musk.
Të enjten, New York Times, duke cituar dy zyrtarë iranianë të paidentifikuar, raportoi se Iravani dhe Musk zhvilluan bisedime sekrete të hënën në Nju Jork. Sipas gazetës, takimi ishte një përpjekje për të “zbutur tensionet” mes SHBA-së dhe Iranit dhe u cilësua si “pozitiv” nga burimet anonime.
As manjati i teknologjisë dhe as misioni iranian në OKB nuk e kanë komentuar këtë çështje. Zëdhënësi i Trump, Steven Cheung tha për NYT se presidenti i zgjedhur nuk do të fliste për “raportet e takimeve private që kanë ndodhur ose nuk kanë ndodhur”.
