Qeveria talibane në Afganistan ka ndaluar artet e përziera luftarake (MMA), duke besuar se janë joislame, tha dikasteri i sporteve i ekzekutivit.

Urdhri për ndalim i është dorëzuar policisë së “moralit” të Afganistanit, që është në kuadër të Ministrisë së Promovimit të Virtytit dhe Parandalimit të Vesit. Sipas njoftimit, ky vendim u mor pasi u hetua një ankesë e bërë ndaj këtij sporti për të parë nëse përputhet me Ligjin islamik apo Sheriatin.

“U gjet se sporti është problematik sa i përket respektimit të Sheriatit dhe ka shumë aspekte që janë në kundërshtim me mësimet e islamit”, tha autoriteti qeveritar i talibanëve për sport.

“Prandaj është marrë vendimi për të ndaluar artet e përziera luftarake në Afganistan”.

Një zyrtar i autoriteti i sportit tha për mediat lokale se MMA-ja u ndalua pjesërisht sepse konsiderohet shumë i dhunshëm dhe rrezikon të shkaktojë lëndime apo vdekje.

Talibanët u rikthyen në pushtet më 2021 dhe që atëherë po zbatojnë një interpretim të ashpër të Ligjit të Sheriatit.