TIRANË
Debate në Komisionin Hetimor për koncesionin e Sterilizimit teksa pritet të dëshmojë ish-ministri i Shëndetësisë Ilir Beqaj. Ky i fundit ka kërkuar të bëjë një prezantim me zë dhe figurë për atë që donte të thoshte, që sipas kryetares së komisionit Albana Vokshi bëhej fjalë për power point dhe e hodhi poshtë kërkesën e Beqajt, i cili kishte në krah avokatin e tij Ermal Yzeiraj. Ndërkohë që ka ndërhyrë deputeti i PS Plarent Ndreca, i cili ka kërkuar të lejohet të bëjë prezantimin siç e dëshiron Ilir Beqaj. Vokshi është ndalur te përfaqësuesi ligjor i Beqajt, i cili është njëkohësisht dhe avokati i Ndrecës në çështjen që ka në SPAK.
Vokshi: E keni menduar shumë gabim
Ndreca: Kjo është mungesë etike dhe profesionalizmin.
Vokshi: Është konflikt interesi prania juaj këtu. Avokati i Ilir Beqjas që është dhe avokati që është në çështjet e hapura ku ju jeni nën akuzë.
Ndreca: Do flisni me mua apo jo.
Vokshi: Do ishte e ndershme të largoheshit fare nga mbledhja.
Ndreca: Ja që nuk varet nga ju.
Vokshi: Z. Beqaj nëse ka deklaratë le ta lexojë, këtu nuk lejohet power point. I thoni avokatit tuaj që shembujt ti marrë nga Shqipëria, jo nga Amerika, ku nuk kufizohen dëshmitarët, nuk kufizohen provat.
Ndreca: Ti nuk flet dot në emër të komisionit, shumica është këtej. Po bën batuta, pa thelb. Kërkesa vjen nga z.Beqaj dhe avokati i tij.
Vokshi: Avokati i tij dhe juaji.
Ndreca: Znj. kryetare nuk më impresiononi dot.
Vokshi: As ju nuk më impresiononi. Nuk ma shpjegoni dot ligjin. Beqaj ka deklaratë le ta lexojë, siç kanë bërë të gjithë në komisionet parlamentare.
Ndreca: Heqja e të drejtës për të folur është shkelje e ligjit dhe Kushtetutës.
Vokshi: Ju dashnorët e Kushtetutës, Kushtetuta nuk kufizon marrjen e provave dhe ju po e shkelni. Shkoni te Surreli dhe dëgjojeni. Këtu ka ardhur t’u përgjigjet pyetjeve të mia dhe deputetëve.
Ndreca: Kush je ti?
Vokshi: Po ti kush je? Z.Arben Ahmetaj nuk iu lejua.
Ndreca: Ne vendosim.
Vokshi: S’ka vendim këtu. Z. Beqaj do ta bëni atë deklaratën vazhdoni se power point nuk vihet.
Ndreca: Fjalën do t’ia përcaktosh ti.
Vokshi: Nuk është konferencë, është këtu për t’iu përgjigjur pyetjeve. Është komision hetimor.
(BalkanWeb)
