Kryeministri Edi Rama gjatë një takimi me shqiptarët në Greqi, u shpreh se vota për Partinë Socialiste në 11 maj do të mundësojë arritjen e qëllimit historik të anëtarësimit të Shqipërisë në Bashkimin Europian.
Ai theksoi se një nga detyrimet e fundit që çdo prind ka ndaj fëmijëve të tij është t’u japë pasaportën europiane, duke u mundësuar atyre të udhëtojnë dhe të respektohen si europianë.
Rama shtoi se me pasaportën europiane, shqiptarët do të ulen me krenari në tryezën e BE dhe për herë të parë do të ketë përkthyes shqip në tryezat ku merren vendimet më të rëndësishme për kontinentin.
“Sot ju i duheni vendit më 11 maj për të realizuar atë që është detyrimi i fundit që çdo prind në të gjithë botën jashtë kufijve të Shqipërisë i ka fëmijëve të vet, që t’u japë pasaportën europiane dhe t’u thotë mësoje gjuhën greke, kulturën, mësoi të gjitha gjuhët e Europës, por nuk ke nevojë të ndryshosh atë që je dhe që e ke të shkruar në pasaportën tënde që je shqiptar. Duke u bashkuar me Edi Ramën dhe PS ke mundësi të shkon në çdo vend të Europës dhe të respektohesh si Europian mes europianëve. Greqia është vendi që keni punuar, por nuk ka nevojë që Shqiponjën ta ndërroni, apo ta harroni. Me pasaportën Europiane të shqiptarëve, ju do të uleni në çdo tryezë të Europës si Shqiponja. Më në fund në pjesën sipër tryezës ku ulen liderët, do të jetë edhe një përkthyes i shqipes e të gjithë do të vënë kufjet të dëgjojnë ç’ka për të thënë shqiptari ”, tha ai.
(BalkanWeb)
