Anëtari i këshillit bashkiak të Tiranës, si përfaqësues i PL-së, Tedi Blushi nga protesta e opozitës ka paralajmëruar se tashmë ka ardhur koha për aksion. Ai tha se durimit të opozitës i ka ardhur kulmi, ndërsa shtoi se njerëzit janë lodhur nga fjalimet e gjata në tubimet e organizuara gjatë 20 protestave opozitare para Bashkisë Tiranë.
“Jemi para këtij institucioni që sot është kthyer në simbolin më të urryer të shqiptarëve. Nuk kam besim se drejtësia do të bëjë drejtësi me këtë kriminel të fëlliqur që fshihet pas policisë dhe shtetit dhe ka miliona euro pasuri të paligjshme. Ne jemi këtu për t’u dhënë fjalën e nderit se nuk do të tërhiqemi.
Do të vijojmë këtë betejë deri në ditën kur të vendoset drejtësi për krimet dhe vjedhjet që ai ka kryer. Është koha e aksionit, pasi durimit tonë i ka ardhur kulmi. Edhe ju jeni lodhur me fjalimet e gjata. Ne do të arrestojmë Erion Veliajn, kudo ku ai ndodhet pasi sa kohë SPAK është bërë palë me krimin.”, tha Blushi.
(BalkanWeb)
