Policia e Shkodrës ka parandaluar një ngjarje të rëndë pasditen e kësaj të mërkure. Sipas informacioneve, një 27-vjeçare ka tentuar që të hidhet në lumin Buna së bashku me 4 fëmijët e saj të mitur.

Policia thotë se pas një njoftimi rreth orës 14:15 një shtetase po tentonte të hidhej në lum së bashku me 4 të vegjlit e saj, të cilët janë të moshave 7, 5, 3 dhe 1 vjeç.

Teksa ngjarja u parandalua, policia ka shoqëruar në komisariat 27-vjeçaren së bashku me 4 fëmijët e mitur.

Një grup i posaçëm hetimor po punon për të zbardhur detajet e ngjarjes që rrezikoi të përsëriste tragjedinë e Alma Arrëzit, gruas që tre muaj më parë hodh së bashku me fëmijët në ujërat e lumit Buna, duke marrë jetën e saj dhe të miturve.

Njoftimi i policisë:

Shkodër / Ndërhyrja e Policisë parandaloi një ngjarje të rëndë.

Tentoi të hidhej në lumin Buna, bashkë me 4 fëmijët e saj të mitur, falë ndërhyrjes së shpejtë nga patrulla e përgjithshme që patrullonte në zonë, pengohet 27-vjeçarja.

Menjëherë pas marrjes së njoftimit, rreth orës 14:15, se një shtetase po tentonte të hidhej në lumin Buna, bashkë me 4 fëmijët e saj, shërbimet e Policisë që patrullonin në zonë, kanë ndërhyrë duke penguar 27-vjeçaren, e cila po tentonte të hidhej në lumë, bashkë me 4 fëmijët e saj 7, 5, 3 dhe 1 vjeç.

27-vjeçarja dhe fëmijët e saj u shoqëruan në ambientet e Komisariatit të Policisë Shkodër.

Grupi hetimor vijon punën për sqarimin e rrethanave të rastit.