Të paktën 20 persona u plagosën dhe shumë ndërtesa u dëmtuan nga një tërmet me magnitudë 6.3 që goditi sot provincën bregdetare të Esmeraldas, në pjesën veriperëndimore të Ekuadorit.

Tërmeti dëmtoi të paktën 60 ndërtesa, sipas vlerësimit të fundit nga Shërbimi Kombëtar i Menaxhimit të Rrezikut të vendit (SNGR).

Probleme janë raportuar edhe në rrjetin e energjisë elektrike dhe telekomunikacionit, ndërsa janë dëmtuar edhe një urë dhe rrugë. Rreth 80% e shtëpive kanë mbetur pa energji elektrike, sipas autoriteteve.

Tërmeti ka ndodhur 8.4 kilometra larg qytetit Esmeraldas, kryeqyteti i provincës me të njëjtin emër, sqaron Shërbimi i Menaxhimit të Rrezikut përmes një postimi në platformën X, duke shtuar se tërmeti është ndjerë në 10 nga 24 provincat e vendit të Amerikës Latine.

Presidenti Daniel Noboa tha se ai kishte vendosur të gjithë ministrat e qeverisë në provincë për të koordinuar ngritjen e strehimoreve, për të ofruar komplete ndihme humanitare dhe për të “ndihmuar me gjithçka që populli ynë ka nevojë”

Kompania kombëtare e naftës ekuadorit, Petroecuador, tha se pezulloi shkurtimisht operacionet në rafinerinë e saj në Esmeraldas.