Në një fund sezoni ku është e vështirë të parashikosh se çfarë bëjnë rivalët, Tirana e sheh veten të vetme dhe në fund. Ekipi më i titullar në vend është në prag të “greminës”, ku 4 javë përpara fundit të sezonit të rregullt mbyllin tabelën e klasifikimit. Në këtë fund sezoni mund të gjesh jo pak arsye për të kontestuar, protestuar etj, pasi jo të gjithë janë të ndershëm apo në garë si Elbasani, por pa diskutim që Tirana, trajneri, lojtarët, drejtuesit e klubit, janë përgjegjës për situatën ku ndodhen.

Në 4 ndeshjet e fundit, bardheblutë kanë marrë 3 brazime dhe 1 humbje, 3 pikë në total janë shumë pak për një ekip që lufton për të mbijetuar. Shqetësuese është fakti që ekipi i Bledi Shkëmbit e ka të vështirë të ruajë avantazhin, por shumë shqetësues është edhe kalendari nga këtu e deri në javën e 36-të.

Pas disfatës me përmbysje përballë Elbasanit, në shtëpinë e Tiranës nuk kanë kohë as të “qajnë”, pasi në kalendari i rezervon derbin e kryeqytetit, sfidën e fundit kundër Partizanit. E sigurt është që të kuqtë nuk hapin rrugë, jo vetëm për faktin që është derbi i përjetshëm, por ndjejnë nga pranë presionin e Elbasanit.

Pas Partizanit, Tirana udhëton drejt Korçës ku i pret Skënderbeu, më pas presin Teutën dhe në fund e mbyllin me Dinamon. Përjashto derbin, 2 nga 3 sfidat e fundit i kanë kundër rivalëve direkt për të mbijetuar.

Në këto kushte, pa frikë, Tirana është ekipi më i rrezikuar për të rënë. Lajmi i vetëm pozitiv është fakti që diferenca me rivalët, Bylis, Skënderbeu e Laçi është vetëm 1 pikë, dhe 2 pikë larg Teutës së vendit të 6-të.

(BalkanWeb)