Tirana është në fund të greminës dhe një fitore në derbi mund ta nxjerrë lart. Gjithsesi, bardheblutë kanë një problem shumë të madh.

Futbollisti me më shumë gola në një skuadër, Ualid Sharmuni, ka treguar oshilacione si brenda, edhe jashtë fushe. Ndonëse ka shënuar dhjetë gola, sërish ai nuk është i qëndrueshëm dhe në takimet decizive nuk ka bërë pothuajse asgjë. Jo vetëm kaq, por si me Bylisin dhe Elbasanin ishin Ernest dhe Përgjoni që kanë nxjerrë skuadrën nga balta. Zharmuni, veç penalltisë së shënuar ndaj Bylisit, në shumë përballje të tjera është fikur.

Jo vetëm kaq, por lojtari njihet për kapriçot e tij dhe është ndëshkuar nga Magani, në dhjetor u largua duke braktisur skuadrën. Edhe me rikthimin e Shkëmbit, historitë kanë qenë të njëjta, me francezin që ka “kapriço”, por që nuk janë toleruar nga trajneri korçar. Tani derbi është në prag dhe Tirana ka vetëm një synim: të fitojë. Në të kundërt, zbritja një kategori më poshtë, është firmosur. Dhe ai që mund të marrë për dore bardheblutë është pikërisht Ualid Zharmuni…

ZGJIDHJE PËR RAFAELIN Lojtari më i rëndësishëm i Tiranës në mesfushë, Rafael Silva, nuk do të luajë në derbin me Partizanin. Mesfushori plotësoi numrin katër të kartonëve të verdhë me Elbasanin dhe lojën do ta shohë nga tribuna. Për bardheblutë kjo është humbje e madhe, pasi braziliani është çelësi i lojës së Tiranës. Futbollist ky, që do të ndihet jo pak në sfidën ndaj të kuqve. Tirana tani e ka “jetë a vdekje” fitoren të hënën e ardhshme. Në vend të Rafael janë disa futbollistë, të cilët mund të luajnë nga minuta e parë, duke filluar me Smaçin, Markun apo ndonjë tjetër.

ABAH I DËMTUAR Po kështu, Shkëmbi duhet të sajojë edhe sulmin. Herën e fundit ka aktivizuar Gjumsin dhe Ndrecën, ndërsa në dispozicion ka Prengajn dhe Haxhiun. Abel Abah është i dëmtuar. Ai nuk ishte fare në sfidën me Elbasanin dhe afrikani nuk do të jetë as në përballjen me Partizanin. Në këto kushte, Shkëmbi duhet të vendosë mes pesë sulmuesve që ka në dispozicion: Ernest, Zharmuni, Haxhiu, Prengaj apo Gjumsi.