Duhet të presë edhe pak për të mbyllur matematikisht garën, por ashtu siç ka ndodhur thuajse gjithmonë në dekadën e fundit titulli kampion në Spanjë do të jetë i Barcelonës. Lionel Messi dhe shokët e tij e kanë fituar gjashtë herë trofeun në këto dhjetë vjet, ndërsa në javën që sapo u mbyll në La Liga vranë garën edhe në këtë sezon me fitoren 2-0 në sfidën direkte kundër Atletico Madrid.
Me këtë sukses skuadra katalunjase thelloi në 11 pikë diferencën me ndjekësit më të afërt dhe kur mbeten vetëm shatë javë nga fundi i sezonit duket e pamundur që ajo të dorëzojë titullin kampion. Atletico Madrid duhet vetëm të ruajë vendin e dytë, pasi tani ndjen shumë pranë rivalët Realit. Skuadra e drejtuar nga Zinedine Zidane ka ngushtuar në vetëm dy pikë diferencën me rivalët e përjetshëm.
Vendi i dytë, sigurisht që nuk do të ishte një sukses, por gjithsesi do të zbuste sado pak zhgënjimin në këtë sezon. Një garë e fortë në La Liga bëhet edhe për vendin e katërt, që jep edhe biletën e fundit për në Champions. Sevilla siguroi fitoren e dytë radhazi, pasi kaloi 2-0 transfertën kundër Valladolid, një ecuri që i lejon skuadrës andaluze të ngushtojë me vetëm një pikë diferencën me Getafen, e cila aktualisht është forca e katërt e kampionatit spanjoll.
(balkanweb)